Chrissy Teigen e përjetoi shumë keq humbjen e djalit të saj, Jack, 2 vjet më parë. Atëherë u tha se modelja pati një abort spontan, por nuk paska qenë kështu. Ajo ka rrëfyer të vërtetën e plotë, në samitin e Propper Daley, “A Day of Unreasonable Conversation”. Chrissy tregoi se mjekët ia ndërprenë shtatzëninë sepse po i rrezikonte jetën.
“Dy vjet më parë, kur isha shtatzënë me Jack, më duhej të merrja shumë vendime të vështira. U bë shumë e qartë rreth gjysmës së rrugës se ai nuk do të mbijetonte dhe se as unë nuk do të mbijetoja pa një ndërhyrje mjekësore. Le ta quajmë atë siç ishte. Ishte një abort. Një abort për të shpëtuar jetën time për një fëmijë që nuk kishte absolutisht asnjë shans. Dhe për të qenë e sinqertë, nuk e kam kuptuar kurrë këtë deri disa muaj më parë. Nuk e kisha kuptuar në këtë mënyrë deri në rrëzimin e ligjit të abortit nga Gjykata e Lartë. U ndjeva çuditshëm që nuk e kisha kuptuar kështu. I thashë botës se patëm një abort spontan, bota ra dakord që patëm një abort spontan, të gjithë titujt thoshin se ishte një abort spontan. U zhgënjeva shumë që në radhë të parë nuk thashë se çfarë ishte dhe u ndjeva budallaqe që m’u desh më shumë se një vit për të kuptuar se patëm një abort”, tregoi modelja.
Chrissy Teigen është e martuar me këngëtarin John Legend. Çifti ka dy fëmijë dhe tani po presin të tretin.
