Të gjithë e dimë atë ndjesinë kur ke dalë nga shtëpia si një princeshë e grimuar me përpikmëri… dhe 10 minuta më vonë dukesh sikur ke bërë sauna. Po, është zyrtarisht sezoni i “fytyrës së shkrirë”. Por s’ka nevojë të ndodhë më!
Ja disa truke për ta mbajtur makijazhin të freskët edhe në ditët më të nxehta të verës:
1 – Fillo me bazën e duhur – Harro kremin e rëndë! Zgjidh një primer pa vaj që matifikon dhe mban gjithçka në vend si super ngjitës.
2 – Kremi me SPF nuk është opsion – Është detyrim! Mbro lëkurën dhe shmang efektin “makijazh i skuqur”. Nëse je kundër kremrave kimikë, kërko opsionet minerale dhe organike!
3 – Më pak është më shumë – Në verë, sa më natyrale, aq më mirë. Zgjidh BB krem ose fondatinë të lehtë me efekt hidratues.
4 – Produktet në formë kremi janë miqtë e tu – Blushi apo highlighter-i në formë kremoze përthithen më mirë dhe nuk rrëshqasin poshtë faqeve.
5 – Mos harro fiksuesin – Spreji fiksues është si llaku për flokë… por për fytyrën. Një shpërndarje e lehtë dhe jeni gati për vapën.
6 – Buzët? Mbaji të thjeshta! – Gloss-i mund të jetë shumë në nxehtësi. Zgjidh një balm me ngjyrë ose tint që nuk fshihet me djersë.
Pra, herën tjetër kur termometri të ngjitet në 35°C, mos u tremb. Me këto truke, makijazhi yt do të qëndrojë më gjatë se takimet në Zoom!
