Mbretëresha Elisabeth dhe Princ Philip hapën dyert e pallatit të tyre për kamerat televizive në 1969-ën me shpresën se do realizonin një dokumentar me tematikë, jetën brenda pallatit. Filmi dokumentar u realizua, por nuk u transmetua kurrë sepse mbretëresha e ndaloi pasi u pendua. Por këtë javë u shfaq papritur në ‘YouTube’ dhe u fshi shumë shpejt, për t’u rishfaqur sërish mëngjesin e sotëm.
Dokumentari i paprecedent i ‘BBC’ ka emrin ‘Royal Family’ dhe ofron një pamje ndryshe të jetës brenda familjes mbretërore. Princ Philip asokohe arsyetoi që një film i tillë do sillte një tjetër këndvështrim të jetës brenda pallatit, por mbretëresha u pendua dhe mori vendimin që dokumentari të mos shfaqej dhe të kyçej larg syve të njerëzve.
Në filmime tregohet jeta e mbretëreshës Elisabeth mes punës dhe familjes, madje shfaqen dhe disa momente më intime familjare ku të gjithë janë mbledhur në dhomë për të lexuar e biseduar. Gjithashtu tregohet zgjimi i madhërisë dhe rutina e ditës së saj./revistawho.com
