20 marsi shënon ditën ndërkombëtare të lumturisë, një datë e caktuar nga Kombet e Bashkuara në Asamblenë Gjenerale të saj. Kjo ditë është krijuar për t’iu kujtuar njerëzve sa e rëndësishme është lumturia, e po ashtu kombeve që duhet të nxisin këtë ndjenjë tek të gjithë.
Ka disa këshilla të vogla që do ju ndihmojnë ta tërhiqni lumturinë drejt vetes dhe kur duket e vështirë.
Shkenca e lumturisë na mëson që lumturia është një emocion, por edhe një aftësi që zhvillohet e trajnohet çdo ditë. Ka 6 zakone që duhet t’i përfshini në jetën tuaj për të kontribuar në mirëqenien e vetes dhe për të tejkaluar situatat stresuese të çdo dite.
Mirësi
Sipas studimeve të ‘Harvard Medical School’ nëse çdo ditë do të bëni gjeste të vogla mirësie ndaj të tjerëve, trupi do ulë ndjeshëm inflamacionin dhe do forcojë sistemin imunitar, duke kontribuar në jetë të shëndetshme dhe jetëgjatësi. Provo të bësh 5 akte mirësie ndaj personave të caktuar brenda 1 jave.
Mirënjohje
Studimi i realizuar nga Universiteti i Kalifornisë ka treguar se kultivimi i sjelljes së mirënjohjes na ndihmon në përmirësimin e energjisë dhe humorit dhe ul nivelet e kolesterolit, apo të hormoneve të stresit. Mund të mbani një ditar dhe çdo ditë të shkruani gjërat për të cilat ndiheni mirënjohës.
Buzëqeshja
Të vendosësh që të ‘veshësh’ buzëqeshjen më të bukur që ke është një investim i sigurt, sepse ndikon edhe tek të tjerët. Madje ka studime që thonë se e qeshura është ngjitëse dhe përmirëson raportet. Duke aktivizuar muskujt e fytyrës ne gjithashtu çlirojmë hormone te të ndjerit mirë: Dopaminë dhe serotonin.
Fjalë pozitive
Japonezi Masaru Emoto ka realizuar disa eksperimente me anë të të cilave ka treguar se uji ka memorien e tij dhe kristalet ndryshojnë formë në bazë të mesazhit të dashurisë apo mirënjohjes që marrin. Meqë ne njerëzit kemi 70% ujë në trupin tonë, mund të ruajmë mirëqenien tonë duke i kushtuar vëmendje fjalëve pozitive që zgjedhim ndaj vetes dhe të tjerëve.
Pusho
Kur nxehemi ose ndihemi të tejmbushur me emocione negative, ne reagojmë sipas impulseve dhe shkojmë drejt pasojave negative. Në këto situata duhet të pushojmë e t’i japim pak kohë vetes që hormoni i stresit , cortisoli të largohet dhe trupi të reagojë në mënyrë më të balancuar. Bëni një shëtitje në natyrë, lexoni një libër, meditoni. Vetëm pak minuta mund të ndryshojnë shumë.
Gjej pozitiven në çdo gjë
Kur ankohemi neuronet në trurin tonë fiken dhe aftësia jonë krijuese që na ndihmon të zgjidhim lehtësist problemet do bjerë ndjeshëm. Studimet kanë treguar se ju duhen të paktën tre mendime pozitive për ta balancuar me një mendim negativ. Kur e kupton që ke mendime toksike, provo të ndalosh, studioi në kokën tënde dhe gjej anën pozitive.
Studimi më i madh për lumturinë që është bërë ndonjëherë ka zbuluar se niveli i lumturisë tek njerëzit është 50% i trashëguar, 10% ndikohet nga jeta dhe 40% nga mendja jonë. Ndaj shmangni mendimet negative dhe fokusojeni vëmendjen tuaj në mendime pozitive dhe marrëdhënie të tilla./revistawho.com
