Të gjithë e njohin zonjën Tefta nga ekrani. Me programin e saj të gatimit, ҫdo mëngjes, ajo është bërë pjesë e familjes së të gjitha amvisave me recetat e larmishme.
Por sot, zonja Tefta ka hequr përparësen e kuzhinës dhe është prezantuar para publikut me një status tjetër. Kush e kishte ditur që nusja e djalit të saj është modelja e njohur Greiss Petroviҫ, themeluese e kompanisë së modelingut “Grace Models”.
Të ftuara si nuse e vjehrrë në programin “Rudina”, Greiss dhe zonja Tefta kanë foluar më shumë për marrëdhënien e tyre nuse – vjehrrë.
Përshkrimin e nis e para zonja Tefta, e cila pyetjes se si është nusja e saj, i përgjigjet: “E mrekullueshme!” Duke renditur të gjitha cilësitë e modeles, Tefta tregon se ka mbetur e mahnitur në momentin e parë që e pa. Ishte një takim rastësor takimi i parë me nusen, kujton ajo, por i paharrueshëm: “Që ditën e parë që e kam njohur, më mahniti me pamjen e saj. Ishte një takim rastësor. Unë kaloja në rrugë dhe shoh edhe këta të dy. Sigurisht, djali ma prezantoi, por për momentin ndenja si e shastisur…. Kur vjen Iliri në shtëpi dhe më pyet si m’u duk Greissi, i thashë: “Nuk kam fjalë, e ke zgjedhur si duhet…”
Më shumë se sa bukurinë e jashtme, me kalimin e kohës, Tefta tregon se ka vlerësuar shpirtin e bukur të Greissit: “Vlerësoj më shumë shpirtin e saj, është një vajzë me një shpirt të bukur, siҫ ka edhe pamjen.”
Nga ana tjetër, Greissi tregon se raporti i tyre ka qenë që në fillim i hapur dhe sekreti i marrëdhënies së tyre të mirë është komunikimi. Ajo vlerëson rolin e Teftës, por edhe të bashkëshortit të saj për të pasur një raport të shëndoshë në familjen e tyre të madhe. Qysh nga fillimi, vijon Greiss, ato të dyja kanë respektuar hapësirën e njëra-tjetrës: “Kur Iliri më tha që jetoj me nënën time, për mua nuk ishte aspak problem, përkundrazi. Unë nuk jam rritur në familjen time me frymën se vjehrra është ‘obobo’, madje është kënaqësi të jetosh me të…” – thotë Greiss duke shtuar se atë dhe Teftën e lidhin edhe shumë gjëra të përbashkëta, aq sa shpeshherë bëjnë edhe kunatën xheloze.
Nuse e vjehrrë ndajnë shumë kohë me njëra-tjtrën, sidomos pasditeve kur janë më të lira pas punëve respektive, madje shpesh bëjnë edhe pazar bashkë. Në shtëpi, natyrisht, Tefta është gjithmonë ajo që gatuan, por Greiss është natyrë tradicionale dhe plotëson të gjithë pjesën tjetër të shtëpisë: “Ajo nuk fle asnjëherë nëse nuk i vë të gjitha gjërat në vend, sado vonë të ketë shkuar…” – shton Tefta për nusen.
Greiss nuk është thjeshtë një modele e bukur që nuk prek gjë me dorë, por as Tefta një vjehrrë që të presë ҫ’di të bëjë nusja. Të dyja kanë gjetur mirëkuptim, madje pa e pasur asnjëherë nevojën që të ndërhyjë djali i shtëpisë. Jo më kot Greiss e konsideron veten me fat./ Class
