“Shapes of a loving heart” është editoriali i veçantë i fotografit Renuar Locaj që së fundmi është botuar si material ekskluziv në revistën amerikane “Ellements”. Dania Bazaiti është vajza brune që shfaqet topless, apo e lyer me baltë në setin që ka ngritur temperaturat këto ditë në rrjetet sociale, duke u bërë hit në internet.
Modelja që ka pozuar më parë për marka të njohura, rrëfen në këtë intervistë për gazetën “Panorama” se ideja e setit nuk është aspak te nuditeti, pasi e gjitha është një histori e trishtë për t’u rrëfyer.
Dimë që eksperiencat e tua në modë kanë arritur kulmin në Milano, ku ke punuar për shumë firma të njohura, si Prada, Versace apo Sisley. Çfarë të ka lënë shije të mirë dhe të keqe nga ato eksperienca?
Po, e vërtetë. Atje kam punuar me firma prestigjioze. Shije të mirë më ka lënë profesionalizmi dhe korrektësia. Shije të keqe nuk më ka lënë gjë, e vetmja vështirë- si është konkurrenca shumë e madhe.
Cili është pikësynimi yt i radhës, vendi që po planifikon ta shkelësh si modele?
Në Londër nuk kam shkuar akoma dhe nuk e kam provuar ende si treg, por ai është pikësynimi i radhës.
Të kemi parë këto ditë në një set fotosh të guximshme topless, të realizuara nga fotografi i njohur Renuar Locaj. Si ishte historia e këtyre dhe qëllimi i realizimit të këtyre fotove?
Nuk besoj se seti fsheh ndonjë guxim të madh, të them të drejtën, sepse ajo është puna ime dhe shumë modele të njohura dhe të panjohura në botë, realizojnë sete fotografike topless. Gjithsesi, ideja e setit nuk është aspak te nuditeti, por është e gjitha një histori. Se si një njeri i zhytur në “baltë” kapërcen çdo gjë dhe rilind si një person më i fortë se më parë, duke kaluar vështirësitë. Seti m’u propozua nga Renuar Locaj në dhjetor dhe më pëlqeu shumë si koncept, dhe seti e videoja e realizuar nga ideografi Blerti Talelli.
E mendove dy herë këtë zhveshje artistike, dhe çfarë komentesh more?
Jo, nuk e mendova dy herë. Seti u prit shumë mirë dhe komentet shumë pozitive.
Je e dashuruar dhe është e vështirë të mbash një lidhje stabël kur je një modele në karrierë dhe që puna të kërkon të jesh gjithmonë në lëvizje?
Jo, nuk jam e dashuruar. Distanca është problem, sidomos udhëtimet e paplanifikuara. Por nuk është e pamundur. Në qoftë se ke personin e duhur në krah që e kupton profesionin tënd dhe ka besim, gjithçka është OK.
Cilat janë sakrificat e tua si një modele që synon botën? Pesha jote aktuale dhe çfarë bën për ruajtjen e trupit në formë?
Unë të vetmet gjëra që kam sakrifikuar janë fastfood-et dhe pijet e gazuara. Mundohem të ha sa më shëndetshëm dhe ta alternoj me aktivitet fizik. Pesha aktuale është 52 kg. Përpiqem të ushqehem shëndetshëm dhe të bëj aktivitet fizik.
Thuhet se një trupi vërtet të bukur i shkojnë veshjet sportive e klasike, por edhe zhveshja? Ti ndihesh komode gjithmonë?
Po, një trupi të bukur i shkojnë edhe veshjet sportive dhe ato klasike.
Në përgjithësi ndihesh e lirë në ushtrimin e profesionit tënd, deri ku mund të shkosh me pozat e tua?
Po ndihem e lirë në profesionin tim. Pozat e mia mund të shkojnë në çdo gjë që është brenda kornizës së artistikes dhe jo vulgaritetit.
Deri ku shkojnë ambiciet e tua në fushën e modës, dhe modeli që ke idhull?
Synimi im është normalisht “Fashion week” në katër qytetet kryesore të modës, NY, Londër, Milano, Paris dhe revistat me emër si: Vogue, GQ, Elle, etj. Modelja e huaj që më pëlqen është Adriana Lima, kurse shqiptare Emina Cunmulaj.
