Balerini i njohur shqiptar Ilir Shaqiri, prej shumë vitesh ka ndërtuar jetën dhe karrierën në shtetin fqinj, Itali. Në një intervistë për Eraldo Rexho në ‘Lart e poshtë’ ka treguar detajet e emigrimit, peripecitë e fillimit, por edhe ka folur si rrallë herë për raportin me të bijën Emily. Sigurisht që gjërat nuk kanë qenë të lehta për balerinin e suksesshëm. Ai ka zbuluar se vendosi të ikte në Itali në një kohë kur sapo kishte mbaruar studimet dhe kuptoi se nuk kishte asnjë të ardhme në Shqipërinë e asaj kohe.
“Ishte periudhë tranzicioni koha kur unë u largova. Kush ka qenë emigrant e di sa e vështirë është 2-3 vitet para. Je thjeshtë një mizë në një botë të madhe dhe askush nuk do t’ia dijë kush je apo çfarë bën. Për më tepër që fama e një shqiptari në vitet ’90 ishte dramatike”,-ka zbuluar Iliri.
I vendosur para pyetjes: “A ke dashur të tërhiqesh ndonjëherë?”, ai ka treguar se e ka menduar shumë shpesh dorëzimin në fillimet e tij. “Kam fjetur për gati 1 vit e gjysmë në një fabrikë çimentoje dhe rroga me të cilën paguhesha duke punuar nëpër shkollat e Sicilisë ishte aq e vogël sa mezi ja dilja. Ato momente mendoja po unë për çfarë kam studiuar dhe punuar. Durova pavarësisht çdo gjëje dhe në fund ja dola. Pata fat”. Më tej Iliri ka zbuluar disa detaje nga raporti me te bijën, Emily e cila po ndjek hapat e tij dhe është një balerinë shumë e zonja edhe pse akoma e vogël.
Për marrëdhënien me të balerini ka treguar se e bija ka një lloj ‘frike’ ndaj tij. “Unë jam strikt me të siç mamaja ime ka qenë me mua dhe atë e preokupon mendimi im, si unë do e shoh atë që ajo bën”,-ka treguar ai. Emily, siç ka treguar Iliri tashmë ka fituar edhe një kontratë me një produksion të madh italian dhe europian për një serial me kërcim dhe këndim./revistawho.com
https://www.youtube.com/watch?v=TgQwqpX-XWM
