Edhe pak ditë na ndajnë nga hapja e një prej hoteleve më të rinj në kryeqytet. Bëhet fjalë për “Hilton Garden Inn”, pjesë e markës ndërkombëtare në fushën e hotelerisë Hilton. Hoteli që do të mirëpresë miq dhe visitorë do t’ju ofrojë klientëve një klimë miqësore dhe një lidhje shumë të natyrshme me Shqipërinë. Kjo vjen jo vetëm përmes shërbimit, por edhe përmes investitorit shqiptar. Në holl, në bar, në dhomat e gjumit bien në sy punimet artistike e fotografitë me motive dhe vende të Shqipërisë. “Jemi të lumtur të sjellim mikpritjen e Hilton Garden Inn në Tiranë. Frekuentuesit e hoteleve Hilton Garden Inn në mbarë botën gëzojnë akomodim të rehatshëm dhe të përballueshëm, pajisje moderne dhe “Hilton Garden Inn Promise”, e cila afirmon qëllimin e markës për t’i siguruar çdo mysafiri një eksperiencë “better and brighter”- ka thënë Menaxheri i Përgjithshëm i Hilton, z. Michael Walker.
Mysafirët e parë në hotel do të priten menjëherë pas hapjes së tij në datën 30 gusht. ‘Me dhoma të rehatshme, një sërë mundësish për ngrënie dhe hapësira të konsiderueshme për takime apo aktivitete, Hilton Garden Inn Tirana është vendi ideal si për udhëtarët e biznesit, ashtu dhe për ata që duan të kalojnë kohë të lirë. Në aspektin e inovacionit, mysafirët të cilët janë anëtarë të Hilton Honors (programi Hilton i vlerësuar me çmime fitimprurëse për klientët) mund të përfitojnë benefite të ndryshme, përfshirë edhe mjete dixhitale të njohura të disponueshme ekskluzivisht përmes aplikacionit celular Hilton Honors. Ne jemi të lumtur që të mirëpresim mysafirët tanë në hotel menjëherë pas hapjes së tij me 30 gusht’- tregon Walker.
Përveç të tjerave ai tregon se zyra e zhvillimit të biznesit e Hilton nënshkroi një marrëveshje menaxhimi me z. Ali Selmani për të hapur Hilton Garden Inn Tirana, duke u shprehur të ngazëllyer që po hapin hotelin e parë Hilton në Shqipëri. Hilton do të mirëpriste mundësinë për të eksploruar projekte të mëtejshme në Shqipëri, por ende nuk ka ndonjë projekt konkret për ta konfirmuar në këtë fazë.\revistawho.com
