Nëse ka një këngëtare e cila është e njohur për ekstravagancën që i shkon shumë për shtat dhe me karakterin e fuqishëm, ajo është Adelina Ismaili. Prej vitesh ka performuar në skenat shqiptare në formën më origjinale të mundshme, madje ka thyer tabu me zgjedhjet e saj. Jemi mësuar të dëgjojmë prej saj këngë që mbajnë mesazhe të forta, i ka kënduar me shpirt dhimbjes dhe gëzimit, por përveç tyre ka rënë në sy edhe mënyra si ka zgjedhur të shfaqet. Shumë shpesh me veshje lëkure, bizhuteri që marrin vëmendje dhe kombinime të pazakonta, për një kohë kur jo gjithçka lejohej.
Me flokët e gjatë në ngjyrë të erret, herë me balluke dhe shpesh herë me gërsheta të vogla që sot janë trend, Adelina duket se ka paraprirë modën e viteve të fundit që në fund të ‘90-ës. E rikthyer në skenë me projektin e fundit ‘T’iqja’, këngëtarja e njohur është po aq origjinale sa në fillimet e karrierës së saj./revistawho.com
