Për shkak të shumë rrethanave, disa këngëtarë janë detyruar që për një kohë relativisht të gjatë të qëndrojnë larg muzikës. Megjithatë disa prej tyre morën vendimin që në 2018-tën të rinisnin sërish punën për t’u rikthyer në muzikë njësoj si më parë. Të gjithë na kanë munguar dhe jemi të lumtur që morën këtë vendim kaq të rëndësishëm në 2018-tën. “RevistaWho.Com” ju kujton personazhet…
Pas një mungese me koncerte dhe këngë të reja, Eneda Tarifa vendosi të rikthehej fuqishëm këtë vit. Si fillim ajo u bashkua me tre këngëtaret e tjera: Irma Libohova, Besa Kokëdhima dhe Rovena Dilo për koncertin “Diva”. Së fundmi ajo ka publikuar dy këngë të reja që kanë rezultuar mjaft të suksesshme. Njëra është bashkëpunimi me Kastro Zizon dhe Robert Berishën me këngën “Çuna dhe goca”. Ndërsa vetëm pak ditë më parë Eneda publikoi këngën “Nuk ja vlen”, që i shkon aq shumë përshtat me stilin muzikor të këngëtares.
Prej më shumë se 1 viti, Tuna i mungoi skenës muzikore shqiptare. Ajo vendosi të qëndronte pranë vogëlushit të saj, Tian, për t’u kujdesur për të. Megjithatë në vitin 2018-të ajo u rikthye me dy këngë shumë ritmike. “Chonga” ishte kënga e parë që Tuna prezantoi këtë vit. Përveç kësaj ajo publikoi edhe një bashkëpunim, “Maria”, me këngëtarin Seven Saraqi.
Pas disa kohësh mungesë, Jonida Maliqi u kthye këtë vit me projekte të reja muzikore. Madje 2018-ta mund të cilësohet si viti i saj, sepse Jonida fitoi edhe çmimin e parë në ‘Festivalin e RTSH’ me këngën ‘Ktheju Tokës’. Ajo do të përfaqësojë Shqipërinë ne festivalin europian, ‘Eurosong’, në vitin 2019-të. Kënga e parë që shënoi rikthimin e Jonidës në muzikë për këtë vit, ishte “N’errësirë”, që u pëlqye shumë nga publiku.
Vitet e fundit të gjithë e ndjemë mungesën e divës së skenës shqiptare, Adelina Ismaili. Megjithatë Adelina nuk hoqi dorë përfundimisht nga pasioni i saj më i madh, sepse në 2018-tën u rikthye sërish. Ajo publikoi projektin “T’iqja”, një këngë me mesazh të fortë për të gjitha gratë dhe vajzat. Pritet që në muajt në vazhdim Adelina të publikojë projekte të tjera muzikore. / revistawho.com
