Është dashuria ajo që përcakton ‘njeriun’ që do të jemi, e jo pasuria. Është koha që ndajnë me ne, rastet kur na shtrijnë dorën pasi jemi rrëzuar… Janë momentet kur na thonë se do të bëhet më mirë, netët kur edhe pse pranë një sobe pa zjarr thuren ëndrra nga përrallat e treguara me zërin e ëmbël… Këto janë rastet kur prania e nënës është më e rëndësishme se çdo dhuratë. Aurela Gaçe, është rritur kështu, nga një nënë bujare, që qëndroi gjithmonë buzagaz, e që u mësoi fëmijëve të saj të ishin të vërtetë… Jo më kot, AG është sot ‘Origjinali’!
Cili ishte urimi që i bëre sot nënës tënde?
Fatmirësisht nuk pres vetëm një ditë që t’i uroj diçka. Por si të gjithë fëmijët, edhe unë, gjënë e parë që i uroj mamit tim, është jetë e gjatë, sa më shumë pranë nesh.
A ka ndryshuar dashuria për të apo të shprehurit e kësaj dashurie pasi u bëre nënë vetë?
Po, sigurisht. Kur ti bëhesh vetë prind, atëherë kupton shumë. S’e di, por diçka e thjeshtë më vjen në mendje tani, një falenderim i bëj Zotit që më dha mundësinë të rritem me nënën pranë. Sot që shtrëngoj në duar krijesën time, shpesh mendoj për ata që s’e kanë njohur kurrë prindin e tyre, ngaqë janë larguar nga kjo jetë apo se për arsye të forta i kanë braktisur. Sot nuk paragjykoj. Sot e di shumë mirë çfarë nëne më ka rritur. Unë jam kështu, sepse ajo është kështu. Pashë e mësova çdo ditë. Indiferentizmin e saj ndaj gjërave materiale, pastërtinë shpirtërore, humorin, të thënit të gjërave troç, pa lajka, të qenit e dashur, bujare, dëshirën për të ndarë të mirat me të tjerët, e shumë cilësi të tjera. Por këto unë arrita t’i shoh mirë e t’i kuptoj vetëm pasi u rrita vetë.
A je bërë më shumë feministe pasi linde vajzë?
Në këtë pikë nuk ka ndryshuar gjë. Mbaj të njëjtin qëndrim ndaj burrave që cënojnë lirinë e grave. Por gjithashtu i dua ata që dinë t’i lumturojnë gratë në jetët e tyre.
Si do të doje të bëhej vajza jote, çfarë ëndërron për të?
Ëndërroj të jetë e lirë, e fortë, e brishtë. Të ketë besim tek vetja. Të dy prindërit i ka të tillë, kështu që përditë do të ushqehet me këtë frymë.
