Spektakli i shumëpritur ‘Top Talent’ do të nisë sezonin e tretë në muajin janar në ekranin e ‘Top Channel’, ndërsa audicionet e para të programit kanë nisur sot, teksa janë shfaqur ‘live’ në ‘livestreeam’.
Ky sezon pritet të ketë shumë surpriza me një gamë më të gjerë konkurrentësh, instrumentistësh, këngëtarësh, kërcimtarësh, interpretuesish në zhanre të ndryshme, prezantuesish dhe gazetarësh.
Edicioni i tretë do të vijë i riformatuar në strukturë, prezantim si dhe në panelin e jurisë sipas burimeve të ‘Top Channel’. Ori Nebijaj do të jetë moderatorja e këtij edicioni pas disa eksperiencave në formate të ndryshme.
Në një lidhje direkte me edicionin e lajmeve në ‘Top Channel’, Nebiaj u shpreh se: “Përfshirja e disa kategorive në këtë edicion është një risi, që është reflektuar në këtë audicion të parë, ku sot kemi parë të rinj që kanë ardhur për të provuar veten në muzikë, interpretim, kërcim, gazetari e sigurisht prezantim. Gjeografia është zgjeruar, kemi shumë pjesëmarrës nga Shqipëria e Kosova, teksa gjej rastin të ftojmë këdo që mendon se ka një talent t’i bashkohen audicioneve tona”.
Një tjetër risi e programit do të jetë edhe autorësia që këtë edicion të tretë i është besuar gazetares së njohur Ilda Lumani, ndërsa producente ekzekutive do të jetë Ledja Liku.
Kujtojmë se ‘Top Talent’ është një mundësi për të gjithë grupmoshat që synojnë të jenë pjesë e televizionit si dhe për të gjithë interpretuesit në zhanre të ndryshme./revistawho.com
