Altin Basha është largua nga “Portokallia” për shkak se nuk ndihej i lirë. Kështu tha regjisori i ftuar në studion e ABC. Në një intervistë me gazetarin Endri Xhafo, Basha u shpreh se e ka parë largimin nga spektakli i humorit si një hapësirë lirie, për të cilën thotë se i ishte cënuar.
Basha deklaroi se do të nisë një tjetër projekt me eksperiencën që ka krijuar. Ndonëse nuk zbuloi shumë detaje, regjisori tha se projekti i ri mund të nisë në mes ose në fund të mandatit në krye të Teatrit Eksperimental.
“Është shumë shpejt për të folur në detaje por ky vendim që e kam marrë pas 17 vitesh do ta jap një përgjigje. Unë nuk kam ndërmend të ushqej thashethemet. E kam parë si një hapësirë lirie. Në momentin kur kjo liri cenohet, arsyeja pse drejtoja Portokallinë ra. Është një kontribut që mendoj se me kohën do të vlerësohet më shumë. Nuk mendoj fare që do të bjerë Portokallia pas ikjes sime. Do duhet të presim për të parë. I uroj suksese atyre që janë atje. Nuk e kam bërë vetëm punën, ka qenë një punë grupi. Kam qenë i privilegjuar që kam punuar me një grup të rinj.
Në fund të mandatit ose edhe në mes mund të krijoj një projekt. Ajo që mund të them është se kam krijuar një eksperiencë fantastike atje. Ajo eksperiencë e krijuar pa dyshim që diku do të shprehet”.
