Ndonëse reperja e njohur, Iggy Azalea ka treguar se nuk është asnjëherë gati për të ndarë lajme tejet të rëndësishme në rrjetet sociale, kësaj here nuk ka mundur të rezistojë pa e ndarë një foto të djalit të saj, Onyx, të cilin është përpjekur ta mbajë larg vëmendjes së rrjeteve sociale.
“Nuk mundem dot ta besoj sa shpejt fluturon koha. Deri dje ishte një top i vockël në krahët e mi”, shkroi Azalea, krah fotos së parë të djalit në llogarinë e saj. Rreth një vit më parë, në muajin qershor, Azalea ndau lajmin se ishte bërë nënë e një djali.
“Prita derisa të vinte koha e duhur për ta thënë, por sa më shumë kalonte koha, kuptoja se gjithmonë do të ndjehem jo mirë në dhënien e lajmeve gjigante”, shkroi 30-vjeçarja.
Ajo shtoi se dëshironte ta mbante jetën e saj larg kamerave dhe paparacëve, por nga ana tjetër kërkonte të theksonte se djali i saj nuk ishte një sekret.
Vogëlushi Onyx lindi si fryt i romancës mes saj dhe ish-it Playboi Carti, raporti me të cilin mbaroi në tetor të 2019-ës. Azalea sqaroi fansat se pavarësisht ndarjes, Carti do të ishte gjithmonë në jetën e të birit./revistawho.com
