Një numër i madh yjesh të njohur të Hollywood-it kanë kërcënuar se do të largohen nga SHBA për shkak të fitores së Donald Trump ndaj Kamala Harris në zgjedhjet e fundit presidenciale.
Trump u rizgjodh president i SHBA-së, një vendim që duket se ka lënë shumë yje të Hollywood-it të cilët e kanë treguar hapur mbështetjen e tyre për partinë demokrate prej vitesh tashmë.
Madonna është treguar tepër e ashpër duke treguar zemërim të thellë me rizgjedhjen, sipas saj, të një “krimineli dhe përdhunuesi” edhe pse këto akuza të saj janë thjesht aludime.
Ndërkohë, vajza transgjinore e mbështetësit të Trump, Elon Musk, njoftoi se po planifikon të largohet nga SHBA.
Të njëjtin qëndrim ndan edhe aktorja e filmit “Barbie” America Ferrera, e cila sipas DailyMail, planifikon të largohet nga SHBA në kërkim të një jete më të mirë për fëmijët e saj. Ajo po mendon të nisë një jetë të re në Mbretërinë e Bashkuar.
Cher deklaroi për The Guardian se ajo ka patur çështje shëndetësore të lidhura drejtpërdrejt me mandatin e parë të Trump dhe u shpreh se nëse ai do të fitonte sërish, ajo do të largohej përgjithmonë nga SHBA.
Aktorja e “Game of Thrones”, Sophie Turner, gjithashtu është zotuar të largohet dhe të kthehet në Britani. Në një intervistë në korrik për një podcast, ish-ylli i Disney Raven-Symoné tha për The View se do të largohej nga SHBA nëse një republikan do të fitonte zgjedhjet.
Ylli i pop-it, Billie Eilish, e cila ka mbështetur hapur Kamala Harris gjatë zgjedhjeve, publikoi një deklaratë të shkurtër në Instagram, duke thënë: “Kjo është një luftë kundër grave.”
E pakënaqur me rezultatin ka mbetur edhe këngëtarja Ariana Grande, e cila shprehu një “rëndesë shpirtërore” teksa ishte në Australi për premierën globale të filmit “Wicked”.
Barbara Streisand kishte deklaruar më parë për Stephen Colbert se nuk mund të jetonte në këtë vend nëse Trump do të bëhej president, dhe madje sugjeroi që do të transferohej në Angli.
Sharon Stone ka thënë në korrik se po shqyrton mundësinë për të blerë një shtëpi në Itali nëse Trump do të fitonte zgjedhjet.
Pavarësisht se asnjëherë s’i dihet dhe këto yje vërtetë mund ta lënë së shpejti Amerikën, zërat kritikë nga pala kundërshtare thonë se asnjëri prej atyre që u zotuan të largohen herën e parë që Trump fitoi, nuk e bëri premtimin e tyre realitet, ndaj mbetet për t’u parë se ç’do të ndodhë.
