Kompozitori dhe këngëtari i njohur, Pirro Çako, ndau emocionet e tij të forta gjatë një interviste në emisionin “Wake Up”, ku foli për takimin virtual me këngëtaren legjendare Parashqevi Simaku. Çako tregoi se ishte i përlotur kur mori lajmin se do të fliste përmes një video-call me një nga ikonat e muzikës shqiptare.
Sipas tij, momenti ishte krejtësisht i papritur dhe i jashtëzakonshëm. “Aty ka shumë dashuri sepse ka sinqeritet. Unë nuk e dija që po filmohej ngjarja. Kam qenë i emocionuar, ka qenë një bisedë e gjatë. Mua më ra një telefon dhe më dhanë Parashqevinë. M’u mbushën sytë me lot,” tha Çako, duke shprehur emocionet që e pushtuan gjatë bisedës.
Gjatë rrëfimit, Çako theksoi se Simaku dukej e shkëputur nga realiteti i Shqipërisë, por ruante një memorie të mprehtë për momentet e së kaluarës. “Ajo, vetëm me sa kuptova, kishte humbur informimin me atë që ka ndodhur në realitetin e Shqipërisë. Ajo e kishte humbur këtë gjë. Memorien e kishte shumë të mirë. Më dha detajet e takimit që ka pasur me mua,” shtoi ai, duke vlerësuar karrierën dhe kontributin e saj në muzikën shqiptare.
Ky takim virtual ishte një përvojë unike për të dy artistët, të cilët ndajnë një lidhje të fortë me artin dhe pasionin për muzikën. Për Çakon, kjo bisedë ishte një moment që do të mbetet gjithmonë i veçantë.
