Një skenë që duket sikur ka dalë nga një film romantik: Princ Leka II u gjunjëzua përpara Blerta Celibashit nën diellin e vjeshtës në Ksamil, dhe me këtë moment, rrjetet sociale shpërthyen.
Por ajo që ka vjedhur vëmendjen nuk është vetëm propozimi — është unaza që tashmë po komentohet në mediat ndërkombëtare.
Sipas “Hello Magazine”, princi shqiptar i ka dhuruar të fejuarës një unazë me vlerë rreth 140 mijë euro, apo 120 mijë paund, një detaj që ka kthyer sytë e botës drejt familjes mbretërore shqiptare.
Eksperti i bizhuterive Nilesh Rakholia, i cili foli për revistën, e përshkruan si një copë arti diskrete dhe elegante:
“E qetë, elegante dhe pa teprime,” – thotë ai, duke shpjeguar se diamanti me prerje ovale ose cushion është vendosur mbi një shirit të hollë me gurë pavé.
Rakholia shton se nëse diamanti qendror është 2 deri në 3 karatë, atëherë çmimi prej 140 mijë eurosh është plotësisht i justifikuar, duke e quajtur stilin “regal, por bashkëkohor”.
Sipas tij, prerjet ovale dhe cushion simbolizojnë
“harmoni dhe dashuri që zgjat”,
duke e bërë unazën jo vetëm luksoze, por edhe me domethënie emocionale.
Çifti e ndau lajmin me ndjekësit në Instagram, përmes disa fotove romantike pranë detit, ku unaza shkëlqente në dorën e Blertës, në një sfond ku qetësia e Ksamilit përzihej me emocionet e momentit.
Fejesa vjen vetëm një vit pas ndarjes së Princ Lekës nga Elia Zaharia, me të cilën ka një vajzë, Princeshën Geraldinë. Lidhja me Blertën u bë publike në shtator 2024, dhe që prej asaj kohe, ata janë parë shpesh bashkë në evente kulturore dhe bamirësie, përfshirë ato të Fondacionit “Queen Geraldine”.
Nëse dikur titujt për familjen mbretërore flisnin për traditë, këtë herë fjala kyçe është rinisje — me një unazë që, siç shkruajnë mediat britanike, është “mbretërore, por pa zhurmë.”
