Beyoncé ka arritur një tjetër majë historike në karrierën e saj, këtë herë jo vetëm artistike, por edhe financiare. Sipas vlerësimit më të fundit të Forbes, superylli amerikan është shpallur zyrtarisht miliardere, duke u renditur mes muzikantëve më të pasur në botë.
Me këtë arritje, ajo bëhet muzikantja e pestë që hyn në këtë klub ekskluziv, përkrah emrave si Taylor Swift, Rihanna, Bruce Springsteen dhe bashkëshorti i saj Jay-Z, i cili sipas Forbes zotëron një pasuri neto rreth 2.5 miliardë dollarë, raporton BBC.
Vetëm disa javë më parë, pasuria e Beyoncé-s vlerësohej në rreth 800 milionë dollarë, por suksesi i vazhdueshëm i projekteve të saj muzikore dhe komerciale bëri që ajo të kalojë për herë të parë pragun simbolik të miliarderes.
Një rol kyç në këtë arritje pati turneu botëror Renaissance 2023, i cili gjeneroi gati 600 milionë dollarë, duke e pozicionuar atë në krye të industrisë së muzikës pop, krah Taylor Swift. Po ashtu, Beyoncé realizoi një film koncerti, turneu i saj i parë solo pas shtatë vitesh, të cilin e shpërndau drejtpërdrejt përmes një marrëveshjeje me rrjetin e kinemave AMC, duke përfituar afro gjysmën e të ardhurave globale prej 44 milionë dollarësh.
Suksesi u pasua edhe nga albumi Cowboy Carter i vitit 2024, një projekt që eksploron rrënjët e zeza të muzikës country. Albumi u përshëndet nga kritika dhe i solli Beyoncé-s çmimin Albumi i Vitit në Grammy – një fitore historike për të, pas katër nominimesh të mëparshme pa triumf.
Edhe turneu Cowboy Carter rezultoi jashtëzakonisht fitimprurës. Forbes vlerëson se ai solli mbi 400 milionë dollarë nga shitja e biletave dhe rreth 50 milionë dollarë të tjera nga shitja e produkteve gjatë shfaqjeve. Në skenë u ngjitën gjithashtu Jay-Z, dy nga tre fëmijët e çiftit dhe ish-anëtarë të Destiny’s Child.
Megjithëse turneu theu rekorde në stadiume si Tottenham Hotspur në Londër dhe Stade de France në Paris, disa shfaqje u përballën me shitje më të ngadalta biletash, duke detyruar promotorët të ulin çmimet për të mbushur tribunat. Sidoqoftë, Beyoncé mbajti titullin për biletën më të shtrenjtë të vitit 2025 në Mbretërinë e Bashkuar, me një çmim maksimal prej 950 paundësh, ndërsa bileta më e lirë kushtonte 71 paund.
Fitimet u shtuan edhe nga një shfaqje speciale gjatë pushimit të ndeshjes së parë të NFL-së të transmetuar nga Netflix për Krishtlindje, e cila solli rreth 50 milionë dollarë, si dhe 10 milionë dollarë shtesë nga bashkëpunime reklamuese me Levi’s.
Me këtë sukses financiar dhe artistik, Beyoncé jo vetëm që forcon statusin e saj si ikonë globale, por edhe shkruan një kapitull të ri në historinë e industrisë së muzikës.
