Kur Lana Del Rey bëri publike lidhjen me Jeremy Dufrene në gusht 2024, reagimi ishte i menjëhershëm, habi, dyshim, madje edhe ironi. “Po këta ç’duan bashkë?”, u bë pyetja që pushtoi rrjetin. Një guidë turistike nga Louisiana, jo pjesë e industrisë së argëtimit, në krah të një prej ikonave më enigmatike të muzikës alternative.
Sipas burimeve të cituara nga Daily Mail, Dufrene nuk kishte “asnjë ide se kush ishte Lana” kur u takuan për herë të parë dhe “nuk e bëri kurrë të ndihej ndryshe për shkak të famës së saj”. Një burim shton se ai “është thjesht një burrë i ndershëm, që e trajton Lanën shumë mirë”, ndërsa një tjetër e përshkruan si “tipik jugor, shumë zotëri”. Në një kontekst ku statusi shpesh paraprin ndjenjën, kjo thjeshtësi duket se është bërë forca e marrëdhënies së tyre.
Vetë Lana ka lënë të kuptohet se dinamika mes tyre është e pazakontë, por pikërisht aty qëndron magjia.
“Është e çuditshme, Jeremy dhe unë kemi atë që quajmë ‘koha në parking’. Kalojmë shumë kohë në parkingje bosh, duke lexuar ose duke biseduar. Ndonjëherë mendon se je i vetmi person që do e donte këtë gjë, por pastaj gjen një tjetër që ndjen të njëjtën gjë”, është shprehur artistja.
Në një epokë të marrëdhënieve të kuruara për Instagram, intimiteti i tyre duket i papërpunuar, pothuajse rebel. Ndoshta kjo është arsyeja pse kjo histori funksionon. Jo sepse ai “e meriton” atë sipas standardeve të Hollywood-it, por sepse Lana Del Rey ka zgjedhur një dashuri që nuk konkurron me dritat e skenës. 
