Kohët e fundit jemi hasur shpesh në lajme me problemet që patën maturantët për t’u regjistruar në universitet e për të fituar degët që donin. U njohëm me studentë ekselentë, të cilët ngelën pa shkollë dhe me studentë që kishin mesatare të dobët, të cilët arritën të fitonin degë të vështira, të cilat kërkonin shumë pikë e pregatitje.
Një lëmsh i vërtetë ka qenë këtë vit me maturantët, por më në fund kaosi ka përfunduar dhe sot ishte dita e parë e nisjes se mësimit në universitet. Normalisht, dihet që kjo nuk është ndonjë ditë që shquhet për mësimin që bëhet, pro më shumë për kafet që nisin të konsumojnë studentët përballë fakultetit apo në ambientet aty afër.
Mirëpo, kur menduam se gjithçka kishte mbaruar, tani në mbrëmje, një surprizë vjen nga Universiteti i Histori-Filologjisë. Është diçka që nuk është parë më parë, por me sa duket, ministria e Arsimit, pasi i mbushi mirë e mirë universitetet private dhe u shkatërroi ëndrrat shumë maturantëve duke i lënë pa shkollë, ka vendosur t’i kënaqë e t’i marrë me të mira ata që do të jenë në vit të parë, duke i “gënjyer” me një festë mirëseardhjeje.
Kështu mbrëmjen e sotme Universiteti i Histori-Filologjisë po shndërrohet në një diskotekë në pamje të vogël, e cila do të mbushet dalë ngadalë, pasi festa zyrtarisht është lajmëruar të fillojë në orën 19:00. Nuk dihet arsyeja e vërtetë e këtij shpenzimi dhe organizimi të pavend, por siç bëjnë me dije studentët e vitit të parë në këtë universitet, gjithçka po bëhet në nder të tyre.
Kur pamë pamjet, fillimisht menduam se po organizohej ndonjë ceremoni diplomimi, por e kishim gabim. Ky universitet ka disa vite që nuk organizon ceremonitë e diplomimit, si për studentët e bachelorit edhe të masterit. Me sa duket, ministrisë i është dridhur dora të shpenzojë për diplomim, ndërsa për të rregulluar imazhin e shkatërruar nga ngjarjet e mëparshme, nuk e ka menduar dy herë dhe ka organizuar këtë festë. Me shumë mundësi do jenë të ftuar edhe gazetarë e kamera të shumta, të cilat si në çdo rast të tillë, nuk do të përtojnë të përcjellin fitoren dhe suksesin e radhës/ Jeta Osh Qef/
