Moderatori Meriton Mjekiqi ishte i ftuar në emisionin “Ndryshe” të Salsano Rrapit dhe Elona Duros, ku foli për projektin e tij të fundit në ekranin e Top Channel.
Me datën 10 janar, ai prezantoi për herë të parë emisionin e ri, “A je bre normal,” një format dinamik dhe energjik që sjell intervista ekskluzive me figura të njohura të showbiz-it, veçanërisht nga bota e hip hop-it.
Ky program shquhet për qasjen e tij të veçantë në zbardhjen e historive nga jeta e artistëve, duke eksploruar sukseset dhe sfidat e tyre dhe duke ofruar një pasqyrë të detajuar të jetës së tyre profesionale dhe personale. Kur u pyet për historinë pas sloganit të emisionit, Mjekiqi tregoi:
“Përpara 6-7 vitesh kanë qenë P.I.N.T-at të ftuar, gjenerata e re e labelit P.I.N.T dhe patën bërë një performancë të jashtëzakonshme dhe gjatë kohës kur po performonin, unë nuk po dija çfarë të bëja. Ishin 6 veta dhe kam thënë ‘A jeni normal bre’. Kjo do të thotë që nuk jeni normal në formën sesi ti po përshtatesh me emisionin, po performon, po bashkëbisedon me mua në një intervistë. Gjithçka e përkufizon me ‘A je bre normal’. Është një shprehje e imja që më ka përcjellë të gjithë jetën.”
Episodi i parë i emisionit u hap me reperin Lyrical Son, një nga emrat më të njohur në industrinë muzikore. Gjatë intervistës, ai ndau detaje mbi karrierën e tij, situatën aktuale në skenën e muzikës dhe marrëdhëniet me kolegët artistë.
