“Hë tani, fejohu se të iku mosha”. “Hë tani, bëje një bebe”. Cila vajzë mbi 25 vjeç nuk e ka dëgjuar të paktën një herë në jetë “këshillën” në rastin më të mirë (se më shumë ngjan si urdhër) që japin pa ua kërkuar të gjithë me radhë, që nga mami e deri tek kushërira e shtatë dhe komshia e katit të katërt? Mentaliteti ynë vazhdon të qëndrojë stoik me idenë që njerëzit fejohen, martohen e bëjnë fëmijë vetëm e vetëm në bazë të viteve, pa llogaritur asgjë tjetër, sepse fundja ne kemi edhe një arsenal justifikimesh folklorike për temën në fjalë: “S’ka mbetur laraskë pa bisht”, “Ku ha dy hanë dhe tre”, “Fëmija ka riskun e vet” dhe me kaq zgjidhet diskutimi. Por falë Zotit, vajzat e reja nuk mendojnë kështu. E pyetur sot në mëngjes gjatë një “ask”-u në faqen e saj, nëse fëmija duhet bëjë 25 apo 30 vjeç, Lori Hoxha dha një përgjigje të shkurtër e të saktë: “Kur të ndihesh gati, kur të kesh një marrëdhënie solide, kur të jesh i stabilizuar financiarisht”. Lori me siguri nuk u ka shpëtuar këshillave dashamirëse si çdo vajzë e moshës së saj që jeton në Shqipëri. Ajo e ka gjetur përgjigjen. Jeni dakord?
