Në karrigen e jurisë së “Albania’s got talent” do të jetë aktori i mirënjohur Agron Llakaj. Prej punës me talente, në një program me talente, ku do të ulet Agron Llakaj në butonin e kuq, apo në atë që jep vetëm mundësi?
“Në profesionin tim dhe në punën time gjithmonë jam udhëhequr nga ideja se çdokush në jetë ka nevojë për mundësi,për një dorë, për një mbështetje dhe për një fjalë, siç ka thënë Jean Paul Belmondo kur e pyetën se kujt ia dedikon famën: I falënderohem atij njeriu që më dha mundësinë të luaja në një film!” Në vite e vite ky ka qenë roli im, duke punuar per vete fort dhe mirënjohës për ata njerëz që më dhanë një mundësi, dhe njëkohësisht i kam shtrirë dorën çdokujt për t’i hapur një dritare apo qoftë një rreze besimi. Nuk ka kënaqësi më të madhe sesa kur shikon rreth vetes ata qe i ke ofruar, i ke rritur artistikisht dhe tashmë janë në projektet e tyre dhe i shikon si partnerë. Ky është mozaiku më i bukur që kam ndërtuar pa kërkuar kurrë diçka mbrapsht.
Edhe sot në “Albania’s Got Talent”, butoni i kuq është gjëja e fundit që më shkon ne mendje të shtyp, kerkoj të nxjerr nga konkurruesit ndoshta dhe diçka që ata s’e kanë vënë re dhe ky proces nuk më lodh. Talentet kanë nevojë për mbështetje dhe si ai fëmija i vogël që tenton të ecë me këmbët e veta por rrezohet e sërish ngrihet të tentojë të ecë, e sërish rrëzohet, por në fund ia de dhe lumturohem kur diku e degjoj: “Agroni më ka dhënë dorën duke më mësuar të eci”! Ky është profesioni im dhe si sfidë e çdo dite, unë e dua”.
