Aktori i madh i humorit durrsak, Muharrem Hoxha është nderuar nga Presidenti i Republikës me titullin “Mjeshër i Madh”, në një ceremoni që ka mbledhur bashkë emra të njohur të artit dhe kulturës në vend.
Me mbi 80 role te spikatura, që kanë përcjellë plot humor, situata e mesazhe të rëndësishme për publikun, Hoxha e ka renditur emrin e tij në pararojën e varietesë durrsake e shqiptare. Presidenti Bujar Nishani vlerësoi kontributin e aktorit të njohur gjerësisht si Rrema i Durrësit dhe u ndal te kënaqësia e të qenit në Durrës, qytetin simbol të qytetarisë, emancipimit dhe zhvillimit të shoqërisë.
Presidenti shprehu mirënjohjen dhe respektin e institucionit që drejton për artistët dhe rolin e tyre në mbajtjen gjallë të vlerave në kohë të vështira.
I emocionuar, por pa lënë mënjanë humorin, Muharrem Hoxha u gjunjëzua para publikut dhe shprehu mirënjohje për këtë nderim që i vjen së bashku me daljen në pension.
Një buqetë e bukur me këngë dhe humor nga Muharrem Hoxha dhe emra të tjerë të mëdhenj të muzikës dhe humorit shqiptar pasuan ceremoninë e dorëzimit të titullit, që vjen si një kurorë e bukur në kokën e aktorit pas një sërë vlerësimesh e titujsh të tjerë të marrë gjatë karrierës së tij 30-vjeçare.
/TopAlbaniaRadio
Discussion about this post