Ditën e dielë në Los Angeles u zhvillua ceremonia e çmimeve “Grammy”. Eventi i rëndësishëm bëri bashkë emra shumë të njohur të ekranit. Përkrahë yjeve botërorë nuk munguan as personazhet shqiptarë, të cilët me talentin e tyre i kanë dhuruar publikut muzikë shumë të mirë. Në event mori pjesë edhe artisti shqiptar, Mirud, i cili u bë shumë i njohur me pjesëmarrjen në “Festivalin RTSH”.
Duke qenë se në “Grammy” të gjithë të pranishmit i kushtojnë një rëndësi të veçantë pamjes së jashtme, Mirudi i kishte besuar daljen e tij një nga kuratoreve më të mira shqiptare, Miranda Dupi. Miranda ka realizuar një veshje të veçantë, të punuar me delikatesë. Nëpërmjet një postimi në ‘Instagram’ ai e falenderon Mirandën, pasi e ka bërë të duket si një yll botëror.
“Duke lënë pas të gjitha shakatë, kam kaluar momentin më të bukur të jetës sime. Gjithmonë e kam dashur këtë xhaketë për vite me radhë, por asnjëherë nuk kam gjetur dikë që mund ta realizojë, përveç Miranda Dupit. Ajo e ka realizuar fiks ashtu si e doja. Shumë prej jush nuk e dinë, por me këtë veshje doja të nderoja një prej artistëve të mi të preferuar, Juan Gabriel”,- shkruan Mirud.
https://www.instagram.com/p/Btt4UNGjgrs/
Ky është një tjetër sukses për Mirandën, e cila prej vitesh i ka bërë yjet shqiptarë të shkëlqejnë në daljet e tyre të rëndësishme./revistawho.com
