Në një intervistë prekëse për emisionin “Mos i bjer me Top”, Xheneta Fetahu foli për herë të parë me detaje rreth fëmijërisë së saj të vështirë dhe marrëdhënies së munguar me nënën biologjike që e ka braktisur.
Në moshën 7-vjeçare, jeta e saj mori një kthesë të madhe, kur në të u shfaq Sabrina, figura që për Xhenetën u bë nënë në kuptimin më të thellë të fjalës. Ajo ndau se nuk ka mundur ta falë nënën e saj biologjike, sidomos pas një episodi të dhimbshëm kur i dha mundësinë të takoheshin, por kjo e fundit refuzoi.
“Jo, për arsye se edhe kur ja dhashë shansin me më taku, nuk ishte aspak mirënjohëse. Kur i dhashë mundësinë asaj, kam qenë shumë keq dhe mendova se do lumturohem, por ajo më bëri më keq. Nëse ajo e sheh këtë deklaratën time do kisha dashur që ta marrë këtë mësim që mos t’i lërë kurrë fëmijët që po jeton tani. Atë boshllëkun që kam brenda meje nuk e mbush askush, po të paktën mos të bëjë ta përjetojnë fëmijët e tjerë.”
E pyetur për atë vajzën e vogël që ishte dikur, Xheneta rrëfen me ndjeshmëri se si fëmijët kanë nevojë për dashurinë dhe praninë e të dy prindërve. Megjithatë, ajo thekson se dashuria mund të vijë edhe nga dikush tjetër që zgjedh të të dojë dhe të kujdeset për ty.
“Unë mendoj që secili fëmijë, si djalë si vajzë, duan të rriten me të dy prindërit se nuk ka ëndërr më të mirë edhe dashuri më të madhe. Po edhe ata që nuk e kanë atë fat të tillë, ju kisha thënë mos të dëshpërohen se mund të vijë dikush në jetë që iu do më shumë se prindi biologjik, me ta lumturu gjithë jetën tënde. Unë mendoj se nuk është prind vetëm ai që të lind po janë ata që kujdesen dhe të edukojnë.”
Frikërat për të përsëritur gabimet e nënës së saj kanë qenë të pranishme tek Xheneta, sidomos kur mendonte për të ardhmen dhe për krijimin e një familjeje. Por fjalët e Sabrinës e kanë ndihmuar ta shohë veten ndryshe.
“Para disa kohësh kam patur ato mendimet, me u martu, me bë fëmijë, edhe gjithmonë kam patur frikën mos do bëj të njëjtin gabim që ka bërë nëna ime biologjike, mos do paragjykohem. E thosha ‘jo nuk dua të bëhem njëherë’. E gjithmonë kur flas me Sabrinën më thotë ‘ti do kesh gjakun tim, do bëhesh si unë, do jesh nëna më e mirë në botë’.”
