Bleona Qereti ka mbi 2 dekada karrierë në muzikë dhe pavarësisht se koha kalon ajo vazhdon të punojë ende me të njëjtin pasion. Që në fillimet e saj Bleona është diferencuar për stilin e veçantë dhe thyerjen e tabuve. Me siguri të gjithë i mbajnë mend pjesëmarrjet e para të këngëtares në festivalin e dhjetorit, në kohën kur shumë pak artistë kishin guximin të shfaqnin anën e tyre të vërtetë. Sot Bleona ka rikujtuar kohë kur është bërë për herë të parë pjesë e këtij festivali, e kur priste vendimin për të kënduar në të. Ajo ka publikuar në ‘Instagram’ disa prej këngëve të saj më të bukura ndër vite dhe ka kujtuar kur në 25 nëntor 1994 fitoi konkursin për të marrë pjesë në festivalin e dhjetorit. “Është një datë e cila do të ngelet përgjithmonë në memorien time. Kanë kaluar 25 vite që atëherë, por unë nuk e harroj atë ditë me shi që prisja para televizionit për të marrë rezultatin e konkursit. Babai im Nazmi Qereti mundohej të më fuste në çadër që të mos lagesha, por unë nga ankthi dhe emocionet nuk ndjeja asnjë pikë shiu që më binte në fytyrë, derisa i ndjeri Selim Ishmaku doli poshtë televizionit dhe na tha: ‘Ne si juri mendojmë që Bleona duhet të këndojë në festival’ – nuk arrija të ndaja lotët nga pikat e shiut….. isha 14 vjeç dhe pjesëmarrësja më e re në festival”, ka shkruar Bleona në postimin e saj.
https://www.instagram.com/p/B5SknO6Jm_9/
Më pas këngëtarja ka falenderuar të gjithë bashkëpuntorët, të cilët i ka cilësuar si legjendat e muzikës shqiptare. Bleona Qereti vazhdon të jetë një nga këngëtaret e preferuara të publikut shqiptar dhe jo vetëm, sepse ajo ka krijuar një karrierë mjaft të suksesshme edhe jashtë vendit. /revistawho.com
