Shfaqja prestigjioze e sportit “Super Bowl” e këtij viti e mbajtur mbrëmjen e 13 shkurtit në stadiumin “So-Fi” në Los Angeles, ishte e mbushur plot surpriza sidomos me performancat e yjeve të muzikës: Eminem, Dr Dre, Snoop Dogg dhe Kendrick Lamar.
Përballja në mes të ekipeve, Los Angeles Rams me Cincinnati Bengals, u shoqërua edhe me një publik të mbushur me yje të Hollywood si çifti, Jennifer Lopez e Ben Affleck, Princ Harry dhe kushërira e tij, Princesha Eugenie, LeBron James e shumë të tjerë.
Si zakonisht, shfaqjet surprizë u mbajtën të fshehta deri në momentin e fundit kur në skenë u performuan Dr Dre dhe Snoop Dogg me këngët “Still Dre” dhe “California Love”, pasuar me një performancë të 50 Cent.
Eminem kundërshtoi udhëzimet e përfolura nga NFL për të mbajtur politikën jashtë shfaqjes së pjesës së parë duke u gjunjëzuar për një minutë në fund të performancës së këngës “Lose Yourself”. Vendimi i tij për t’u gjunjëzuar me dorën në kokë dukej se ishte një shfaqje solidariteti për ish-mbrojtësin e NFL, Colin Kaepernick dhe lojtarë të tjerë të futbollit që janë gjunjëzuar gjatë himnit kombëtar për të protestuar kundër pabarazisë racore dhe brutalitetit të policisë.
Pjesë e publikut ishte edhe Kanye West bashkë me vajzën e tij North, të cilët u panë duke parë ndeshjen./revistawho.com
