Pas dy vitesh heshtjeje, Chiara Ferragni ka dhënë intervistën e saj të parë publike, vetëm pak ditë pasi gjykata e shpalli të pafajshme në çështjen e mashtrimit të rënduar, të lidhur me fushatat “Pandoro Balocco Pink Christmas” dhe “Uova di Pasqua”.
Influencerja dhe sipërmarrësja 37-vjeçare ka treguar për mediat italiane se vendimi i gjykatës i ka sjellë më në fund qetësi, duke i dhënë fund një periudhe të vështirë që kishte nisur në vitin 2022. Ajo ka zbuluar se pas shpalljes së pafajësisë e ka festuar në mënyrë të thjeshtë, në shtëpi, e rrethuar nga njerëzit e saj më të afërt.
“U thashë të gjithë miqve të vinin në shtëpinë time. Do të rrimë bashkë, në qetësi. Tani po filloj sërish të jetoj”, është shprehur Ferragni.
Në intervistë, Chiara ka folur edhe për divorcin me reperin Fedez, me të cilin ka dy fëmijë, Leonen 8 vjeç dhe Vittorian 4 vjeçe. Ajo ka treguar se ndarja ndodhi pikërisht në periudhën kur shpërtheu skandali i pandorove, një moment që e përshkruan si më të errëtin e jetës së saj.
“Përjetova një ndarje publike në momentin kur kisha më shumë nevojë për mbështetje. Jam ndier e braktisur dhe kam vuajtur shumë”, ka deklaruar ajo.
Ferragni ka theksuar se krizat e mëdha tregojnë se kush qëndron vërtet pranë teje:
“Kur je në sukses, të gjithë duan të jenë aty. Por kur bie, shumë zhduken. Pranë meje mbetën vetëm familja, nëna ime, miqtë e vërtetë dhe avokatët.”
Ajo ka sqaruar gjithashtu se gjatë realizimit të fushatës së pandorove ndodhej në kulmin e karrierës: Sanremo, projekte televizive, fushata ndërkombëtare dhe iniciativa bamirësie. Sipas saj, nuk ka pasur kurrë synim përfitimi personal.
“Ishim në majë të suksesit dhe nga ajo fushatë nuk fituam asnjë euro. Kam qenë naive, por gjithmonë në mirëbesim. Megjithatë, i kam marrë të gjitha përgjegjësitë mbi vete”, ka thënë ajo.
Sot, Chiara thotë se është një njeri i ndryshuar:
“Më parë mendoja vetëm për suksesin. Tani kam mësuar të kujdesem për veten, të mos fajësoj veten dhe të besoj se e vërteta del gjithmonë në dritë.”
Në përfundim, Ferragni shprehet se pas vendimit të gjykatës ndihet më në fund e lirë dhe gati për një fillim të ri:
“Tani mund të them se po rikthehem të jetoj.”
