Aktori legjendar Gene Hackman, fitues i çmimit Oscar, u nda nga jeta pas komplikacioneve nga një sëmundje e zemrës, vetëm disa ditë pasi gruaja e tij, Betsy Arakawa, vdiq nga një infeksion i rrallë në shtëpinë e tyre në Santa Fe. Një patolog, duke folur për mediat e huaja, konfirmoi se çifti ishte gjetur i vdekur më 26 shkurt, në dhoma të veçanta të shtëpisë së tyre.
Hackman, i cili vuante nga Alzheimeri në fazë të avancuar, besohet të ketë qëndruar i vetëm me trupin e bashkëshortes për rreth një javë para se të ndërronte jetë. Sipas Dr. Heather Jarrell, kryeekzaminuese mjekësore për New Mexico, Betsy Arakawa mendohet se ka vdekur rreth datës 11 shkurt.
Sëmundja fatale: Çfarë është sindroma pulmonare hantavirus?
Pas ekzaminimit mjekësor, u konfirmua se Betsy Arakawa, e njohur ndryshe si Betsy Hackman, kishte humbur jetën nga sindroma pulmonare hantavirus (HPS), një infeksion i rrallë, por potencialisht vdekjeprurës.
Ky virus prek kryesisht sistemin e frymëmarrjes dhe transmetohet nga brejtësit e infektuar, përmes pështymës, urinës apo jashtëqitjeve të tyre. Infektimi ndodh zakonisht kur njerëzit thithin ajrin e kontaminuar gjatë pastrimit të ambienteve ku kanë jetuar brejtësit, si kasollet apo dollapët, ose përmes konsumimit të ushqimit të ndotur.
Megjithëse është një sëmundje e rrallë në Shtetet e Bashkuara, shumica e rasteve raportohen në zonat perëndimore si New Mexico, Arizona, Kolorado dhe Utah.
Lajmi pozitiv është se hantavirusi nuk transmetohet nga personi në person, siç konfirmon Dr. Jarrell, duke ulur rrezikun e përhapjes nga një individ tek tjetri.
