“Një telefonatë Contes për të ndihmuar Shqipërinë time? Më jepni numrin, se e marr menjëherë”. Gianni De Biasi nuk e mendon dy herë dhe të nesërmen e suksesit ndaj Rumanisë, i nis një mesazh të qartë kolegut të tij që drejton azzurrët, duke i kërkuar favorin për të mundur Irlandën, kundërshtarin e radhës të Italisë, në ndeshjen e fundit të Grupit E.
Një fitore e Italisë që do të shtonte shpresat e kuqezinjve për të kaluar fazën e grupeve, si një prej ekipeve më të mira të renditura në vend të tretë. Është thuajse e sigurtë që Conte do të bëjë maksimumin e tij për të kënaqur kolegun e tij bashkëkombas. Edhe pse Italia e ka siguruar tashmë kualifikimin, trajneri i azzurrëve u shpreh qartë: “Duhet të fitojmë edhe këtë ndeshje”.
“Këto tre pikë edhe mund të na mjaftojnë për të kaluar në fazën e dytë. Sido që të shkojë, ishte një Europian madhështor, me tre paraqitje shumë të mira. Si për ironi të fatit, dje ndaj Rumanisë kishim më pak raste, në raport me dy ndeshjet e tjera, ku paguam disi presionin për rreth nesh. Mbrëmë u liruam nga kjo peshë. Kemi aftësinë për të njohur kufijtë tanë. Kjo është forca jonë e madhe në këtë kompeticion”, u shpreh De Biasi për programin “Të gjithë të grumbulluar”, në Radio 24.
“Franca sipas meje nuk është një skuadër. Ka futbollistë të mëdhenj, por nuk arrin të formojë një grup që të arsyetojë si skuadër. I lejon shumë mundësi kundërshtarëve të saj. Edhe ne patëm disa raste ndaj tyre”, deklaroi trajneri i Shqipërisë. Kuqezinjtë të cilët e mbyllën grupin në vendin e tretë, pas Francës dhe Zvicrës, u zgjuan sot me humorin në maksimum. Ajo që është realizuar deri më tani shkon përtej pritshmërive, por për të festuar duhet pritur deri të mërkurën, kur do të mësohet nëse përfaqësuesja e drejtuar nga De Biasi do të arrijë të përzgjidhet mes të tretave më të mira, pra nëse do të mund të vijojë aventurën e saj në Francë. Ndërkohë, qeveria shqiptare ka vendosur të shpërblejë ekipin me një shumë prej 1 milionë euro pas fitores ndaj Rumanisë.
