A është ky një revolucion në marrëdhëniet romantike apo një tjetër hap drejt kontrollit total? Një shpikje e re po ngjall debat të madh: bëhet fjalë për një unazë inteligjente që do t’ju japë mundësinë të njihni ndjenjat e partnerit në kohë reale.
Quhet “The Ring” dhe, ndonëse emri mund t’ju kujtojë një film horror, ka diçka po aq shqetësuese edhe në këtë rast.
Kjo pajisje, e cila pritet të dalë në treg në fund të vitit 2025 ose në fillim të 2026-ës, është krijuar nga platforma e takimeve Raw and Queens Tech. Unaza monitoron emocionet dhe sjelljet e atij që e mban, duke përdorur të dhëna si rrahjet e zemrës, toni i zërit dhe madje edhe eksitimi seksual.
“Me fjalë të thjeshta, është një mjet që na lejon të kuptojmë nëse partneri ynë është besnik… apo nëse ka qëllime të tjera.”
Bazuar në këto sinjale biometrike, unaza do të lëshojë drita me ngjyra të ndryshme që tregojnë gjendjen emocionale dhe fizike të përdoruesit. Për shembull, nëse një ngjyrë tregon stres, partneri mund të reagojë me një gjest përkrahës apo ngushëllues.
“Ideja pas kësaj pajisjeje është të lehtësojë komunikimin (të paktën, në këtë pikë, duhet të jetë e vështirë të mos e kuptosh tjetrin).”
Por gjithçka nuk është kaq rozë. Një nga veçoritë më të debatueshme është ajo që mat eksitimin seksual. Nëse unaza lëshon një dritë magenta, kjo do të thotë se personi është i eksituar. Pyetja që shtrohet është: “Po nëse ai/ajo nuk është me ju në atë moment? Eh, interpretimi mbetet në dorën tuaj.”
Një shpikje që mund të ndryshojë mënyrën si ndërtojmë besimin – ose ndoshta ta shkatërrojë plotësisht atë. Mbetet për t’u parë.
