Për herë të parë një atlete shqiptare është e ftuar në paradën e yjeve të fitness-it botëror, dhe ajo është Dorina Mema. Menaxherët e federatës “WBFF” e përzgjodhën për të qenë pjesë e paradës së famshme në Beverly Hills Hollywood, ku marrin pjesë trupat më të bukur të planetit. Dorina rrëfen për “Panoramën” se si ia doli të jetë pjesë dhe atlete e “WBFF”, nga ku kanë dalë mbretëreshat me fizik perfekt, të cilat dikur i ëndërronte.
Je e ftuar në paradën e yjeve botërorë të fitnesit në Hollywood. Mund të na tregosh se si të erdhi ftesa dhe çfarë rëndësie ka për ty ky spektakël?
Wbff është federata ku janë spikatur të gjitha imazhet botërore të fitnesit, pikërisht ata që ne i shikojmë me adhurim nga ekrani apo fotot. Ata të cilët sot zotërojnë gjithë tregun online, për sa i përket mënyrës së stërvitjes, ushqimit apo veshjeve sportive, ata që na çudisin në Instagram, ndonjëherë dhe me photoshop-e, por që ia kanë dalë falë kësaj federate. “Wbff” është spektakli ku takohet fitnesi me fashionin, vetmi dhe më i ndjekuri në botë, me trupat më të bukur në planet. Çdo vit në muajin gusht jepet kurora e mbretëreshës së vitit, ku siç dihet nga shumë adhurues të fitnesit, ajo ka qenë braziliania Andreia Brazier.
Shumë mendojnë se i ngjan brazilianes Braizer, të ka sjellë fat ky fakt?
Shumë njerëz thonë se i ngjaj asaj. Ky fakt s’u ka shpëtuar as menaxherëve të federatës, të cilët në kërkim të imazheve të reja më spikatën mua në hashtaget e faqeve, ku si prezantim i parë i saj do jetë më 15 tetor në Beverly Hills Hollywood, një shfaqje me veshjet e bukura të “Victoria Secret’s”, tipike me krah dhe dekore skenike. Ndërkohë që unë do të jem një atlete e “Wbff”, në pritje të titullit “Prodiva”, pas një testi dietologjik. Rëndësia e kësaj ftese për mua është maksimale, pasi është një kapak me dinjitet nëse heq dorë nga garat, ose një fillim i madh nëse vazhdoj.
Si ndihesh përpara eventeve të tilla, kur të duhet të përfaqësosh Shqipërinë?
Unë e shoh si një realizim sfide me veten, kur në 2012 unë i kisha idhuj dhe sot u bashkohem atyre. Ajo është federata që i përshtatet kategorisë sime, muskuj të bukur fit, dhe mënyra si organizohen eventet në mbarë botën. Është federata që ta jep botën në dorë, mjafton të vij gjithmonë në përmirësim. Në Shqipëri mbetem e para femër fitnes në gjithë historinë sportive, dhe është detyra ime ta çoj Shqipërinë në njërën nga tri federatat më në zë në botë, siç është kjo.
Po ushtrohesh intensivisht tani, dhe cila është rutina jote e stërvitjes?
Dhe pse kam pak kohë, besoj do arrij të bëhem gati. Stërvitem dy herë në ditë, me një dietë si për të shtuar muskuj, njëkohësisht dhe për të shkrirë masën dhjamore. Është sfilitëse, por më duhet t’ia dal. Unë gjithmonë e mendoj jetën me dyer hekuri pas shpine, ku nuk ekziston mundësia e një hapi prapa. Unë bëj veç para.
Një femër me trup të skalitur si ty, a ka ndonjë pikë të dobët, pra që s’të pëlqen te fiziku?
Ajo që më pëlqen te fiziku im është metabolizmi dhe energjia, ndërsa ajo që s’më pëlqen është gjatësia. Do të doja nga 1,64 m të isha 1,70 m, edhe pse fitnesi i kërkon jo të gjata. /Panorama
