Mbrëmjen e djeshme Dua Lipa ishte e ftuar në “The Tonight Show Starring Jimmy Fallon”, ku ka zbuluar se në adoleshencë ka qenë fansja më e madhe e 50 Cent. Ajo ka treguar se dashuria për hip-hopin ka lindur gjatë jetesës së saj në Kosovë. “Spektakli i parë ku kam qenë unë ka qenë i dy reperëve, Method Man dhe Redman. Unë isha 13 vjeçe. Ne jetonim në Kosovë, ku njerëzit dëgjojnë vetëm hip-hop. Duke shkuar në spektaklin e Method Man-Redman ishte prezantimi im i parë me Wu-Tang (Clan). Më pas kur shkova në spektaklin e dytë, që ishte 50 Cent, lexova libër, pashë një film, mësova të gjitha fjalët. Shkova plotësisht e përgatitur. Isha fansja më e madhe e 50 Cent”, ka treguar Dua. Ajo ka rrëfyer se kur ishte e vogël shpresonte që këngëtarët e saj të preferuar të shkonin në Kosovë për koncert, por askush nuk e bënte atë gjë, pasi nuk ishte një vend i njohur për artistët e famshëm. “Kur jetoja në Kosovë shpresoja që të kisha mundësinë të shihja disa nga artistët e mi të preferuar si Pink dhe Nelly Furtado… Por askush nuk erdhi në Kosovë”, ka thënë Lipa. Më pas ajo ka shtuar se për të ishte një ëndërr e bërë realitet që solli Miley Cyrus në vendlindjen e saj për koncertin “Sunny Hill Festival”. Dua është shprehur se është ndjerë shumë krenare kur ka parë se sa të lumtur ishin njerëzit dhe sa shumë e pëlqyen performancën e Cyrus. Këngëtarja me origjinë shqiptare dhe babai i saj, Dukagjin Lipa, kanë organizuar festivalin “Sunny Hill Festival” për dy vite me radhë në Prishtinë për të tërhequr vëmendjen e artistëve me famë botërore dhe turistëve. /revistawho.com
Dua Lipa kujton fëmijërinë e saj në Kosovë: Shpresoja që të shihja nga afër artistët e famshëm
