Dua Lipa ka hapur zemrën në një intervistë të fundit për revistën British Vogue, ku jo vetëm që ka folur për lidhjen e saj me aktorin Callum Turner, por edhe për dëshirën e thellë për të pasur fëmijë në të ardhmen.
Këngëtarja 29-vjeçare, e cila do të jetë në kopertinën e numrit të korrikut të revistës, tha:
“Do të doja shumë të kisha fëmijë. Por gjithmonë e kam pyetjen e vazhdueshme: kur do të ishte koha e duhur, si do të përshtatej me punën time, si do të funksiononte nëse shkoja në turne, dhe sa kohë do të duhej të merrja pushim”, u shpreh ajo.
E pyetur më tej për këtë temë, Lipa shtoi:
“Mendoj se është një nga ato gjëra që do ndodhin kur të ndodhin. Më pëlqejnë shumë fëmijët, por mendoj se të rritësh një fëmijë është shumë më tepër se thjesht të duash fëmijët.”
Në intervistë, ajo konfirmoi gjithashtu fejesën me aktorin 35-vjeçar Callum Turner.
“Po, jemi të fejuar. Është shumë emocionuese,” tha Lipa gjatë një darke me gazetarët.
Ylli britanik rrëfeu se partneri i saj ishte këshilluar me motrën dhe shoqet e saj më të ngushta përpara se t’i propozonte.
“Jam e dashuruar me të. Është shumë për mua,” tha ajo. “Është një ndjenjë e mirë të dish që personi me të cilin do të kalosh pjesën tjetër të jetës tënde të njeh shumë mirë.”
Më 9 qershor, Dua ndau me ndjekësit disa foto në Instagram ku tregonte unazën e saj të fejesës – një diamant i dukshëm në gishtin e saj – ndërsa pozonte me Turner, që në një prej imazheve e përqafonte dhe e puthte në ballë.
