Pranvera Metolli është një “make up artist” e specializuar në Itali për filmat horror, kështu që nata e frikshme e Halloween-it ishte e duhura për të. E fejuara e aktorit të njohur të spektaklit të humorit “Portokalli”, Rezart Veleshja, rrëfen eksperiencën e asaj nate, shkruan “Panorama”, dhe fantazitë e frikshme të VIP-ave që ajo i bëri realitet.
Cilat ishin dëshirat e personave të njohur që kishin vendosur të festonin natën e frikshme në club-et e Tiranës?
Gjatë natës së Halloween-it kam punuar në tri klube. Ishin të shumtë personazhet e njohur, të cilët i pikturova për natën e frikshme. Më tepër kërkonin “zombie face”, të vdekurit e ringjallur. Normalisht këtë vit u realizua më në fund në Shqipëri tamam ideja reale e Halloween-it, sepse kjo natë u krijua si festa ku njerëzit grimohen frikshëm për të trembur të vdekurit. Prandaj dhe unë shfrenova idetë e mia nën efektet speciale.
Sa ishte numri i personave që grimove brenda natës?
Këtë vit kam arritur një numër të lartë të personave që kam grimuar brenda natës (diku më tepër se 50), disa prej tyre të njohur. Të gjithë i grimova vetëm në mbrëmje dhe me efekte speciale.
Ti je specializuar në Itali si grimiere për kinemanë horror. Pate oferta jashtë vendit?
Po, por bëra mirë që zgjodha që këtë natë të isha në Shqipëri, pavarësisht kërkesave që kisha dhe jashtë vendit. Mendoj se ia arrita qëllimit duke parë dhe reagimin e personave “live”, po ashtu dhe të ndjekësve të mi në rrjetet sociale, ku kam marrë pa fund mesazhe pozitive.
Sa paguhesh për një efekt të tillë?
Pagesa për një efekt special është më e lartë se një grim normal për shkak të kostos së produktit, plus varet edhe nga kërkesa e klientit.
