Mbrëmjen e djeshme Angela Martini ishte e ftuar në emisionin “Opinion”, për të promovuar librin e saj të ri “Dashuri, shpresë, dritë”. Ajo ka ndarë me publikun detaje nga jeta e saj personale dhe tregoi se fëmijëria nuk ka qenë aspak e lehtë për të. Me dy prindër të divorcuar, ajo është përballur me situata të vështira. Teksa jetonte me gjyshërit dhe kushërinjtë e saj në Shkodër, dikush ka tentuar ta rrëmbejë dhe ajo ishte vetëm 10 vjeçe. “Ishte zheg dhe familjarët e mi ishin në gjumë kurse unë po luaja përjashta me një shoqe. Një burrë m’u afrua, më pyeti për familjen dhe më tha se njihte tim atë. Kur i thashë se ai ishte në Zvicër, ai më ofroi akullore dhe më kapi për dore. Kur pashë makinën e tij me disa burra të tjerë brenda, e kuptova çfarë po ndodhte. I kafshova dorën dhe u largova”, ka rrëfyer modelja. E gjendur në këtë situatë të vështirë, e ëma e nisi Angelën për në Zvicër dhe aty modelja ka hasur vështirësi edhe me njerkën e saj. Pas ndarjes, i ati i Angelës ishte martuar sërish dhe kishte krijuar një jetë të re në Zvicër. E pyetur nga Fevziu se si ishte marrëdhënia me njerkën, Angela u shpreh se ka qenë shumë e vështirë. “Marrëdhënia me njerkën ishte si historia e ‘Borëbardhës’, ajo nuk më donte mua. Shpifje, mashtrime, babai nuk më besonte dhe unë e mbajta sekret deri 18 vjeçe, që njerka sillej keq me mua. Qëndrova 9 muaj në shtëpi pa shkollë, dhe nuk flisja me mamin, pasi njerka i kishte vendosur vizën e kuqe që të mos shkelte në Zvicër”, vazhdoi Angela duke treguar vështirësitë e saj. Në përfundim të bisedës ajo tregoi se nuk ka një marrëdhënie të mirë me të atin dhe se tani ajo flet më të vetëm një ose dy herë në vit.
