Aktori britanik Julian Sands është identifikuar si alpinisti që u zhduk në malet San Gabriel disa ditë më parë. 65-vjeçari u raportua i zhdukur në zonën Baldy Bowl të premten, mes motit të keq në Kaliforninë jugore.
Policia tha se ekipet e shpëtimit tokësor u tërhoqën nga mali fundjavën e kaluar për shkak të rreziqeve të ortekëve, por kërkimet kanë vazhduar me dron dhe helikopter.
Sands është i njohur për rolet në filma të famshëm dhe drama televizive, duke përfshirë A Room With A View, 24 dhe Smallville.
Në një deklaratë të dhënë për agjencinë e lajmeve PA, departamenti i Komisariatit të San Bernardino bëri të ditur se Sands u raportua i zhdukur rreth orës 19:30 me orën lokale të së premtes 13 janar.
Ekipet e kërkimit dhe shpëtimit të departamentit “u përgjigjën dhe filluan kërkimet”, shtuan ata, por ishin penguar nga paralajmërimet e rënda të motit.
Policia shtoi se kërkimet tokësore do të planifikoheshin kur të përmirësohej moti dhe kushtet të ishin më të sigurta për ekipet e shpëtimit.
Sands ka jetuar në Los Anxhelos që nga viti 2020 dhe së fundmi u shfaq në dramën “Benediction”, ku luajti gjithashtu Peter Capaldi.
