Një ngjarje e jashtëzakonshme ka ndodhur në Kështjellën Windsor, ku dy persona kanë arritur të thyejnë sigurinë dhe të kryejnë një vjedhje në territorin mbretëror.
Incidenti, i ndodhur gjatë natës më 13 tetor, ka dalë në dritë vetëm tani dhe ka tronditur opinionin publik.
Sipas burimeve, hajdutët kanë kaluar gardhin e lartë të kështjellës dhe kanë përdorur një kamion të vjedhur për të shkatërruar portën e oborrit. Pasi hynë në kompleks, ata vodhën disa automjete dhe pajisje nga një fermë brenda territorit.
Mediat britanike raportojnë se princi William dhe princesha Kate, së bashku me fëmijët e tyre, ndodheshin në shtëpinë e tyre private, Adelaide Cottage, vetëm disa minuta larg vendit të ngjarjes. Fatmirësisht, askush nuk u lëndua.
Policia njoftoi se hajdutët janë larguar me një kamionçinë të zezë Isuzu dhe një biçikletë me katër rrota, të cilat u vodhën nga një hambar pranë fermës. Të dyshuarit janë parë më pas në zonën e Windsor-it të vjetër dhe Datchet. Hetimet për identifikimin e tyre po vazhdojnë.
Kjo ngjarje ka ngritur shqetësime të mëdha për sigurinë e familjes mbretërore, duke qenë se porta e shkatërruar është një nga hyrjet më të përdorura nga ata. Në momentin e ngjarjes, Mbreti Charles nuk ndodhej në kështjellë.
Ky incident mbetet një prej më të pazakontëve që kanë prekur një nga simbolet kryesore të familjes mbretërore britanike.
