Johnny Depp do të paguhet të paktën 10 milion dollarë për filmimin e një skene në “Fantastic Beasts 3”, ndonëse Warner Bros e ndërpreu bashkëpunimin me aktorin. Depp nuk do të luajë më Gellert Grindelwald dhe përpos kësaj publikimi i filmit është shtyrë deri në 15 korrik 2022 për shkak të situatës me pandeminë. Ishte planifikuar që filmi të dilte në kinema më 12 nëntor 2021.
Vendimi i Warner Bros për të shkëputur bashkëpunimin me Depp erdhi pasi gjyqi i tij për shpifje kundër tabloidit “The Sun” u pushua. Aktori e hodhi në gjyq tabloidin pasi e kishte quajtur atë “dhunues grash”, pas ndarjes nga Amber Heard.
Depp kishte një dispozitë të veçantë në kontratën me Warner Bros, që i jep atij të drejtën të paguhet pavarësisht çfarë ndodh me filmin.
Javën e kaluar Depp doli me një deklaratë ku u shpreh se jeta dhe karriera e tij nuk do të përcaktohet nga ky moment. “Do të doja të falënderoja të gjithë ata që më kanë mbështetur. Jam i përulur dhe i prekur nga mesazhet tuaja, veçanërisht gjatë ditëve të fundit”-tha Depp.
