Aktorët e spektaklit “Portokalli” po përgatiten për natën premierë të këtij sezoni të ri në “Top Channel”, që do të jetë më 2 tetor. Një nga protagonistët kryesorë, Erion Isai, pjesë e dyshes së famshme PSLSI me Bes Kallakun, këtë sezon e nis si baba, pas ardhjes në jetë të vajzës Ajer. Për personazhet e reja në rrethana të reja, që do të vijnë në spektaklin e humorit, dhe ndryshimet në jetën e tij personale, Erioni jep këtë intervistë të parë për gazetën “Panorama”…
Këtë sezon televiziv ti do të jesh me statusin e babait. Të ka ndryshuar si person ardhja në jetë e Ajer?
Po, sigurisht që më ka ndryshuar. S’di ta përshkruaj ndjesinë personale e familjare. Ajer ka përforcuar themelet e përkushtimit, dëshirës, të cilat uroj dhe besoj që do të reflektohen edhe në punën time! Si është ndjesia e babait për herë të parë, dhe pse e quajtët Ajer? Ndjesinë s’di ta them… Momenti i parë ishte sikur mungonte Ajër. Ndërsa emri ka dy kuptime: Ajër, kuptimi i Ajrit dhe bashkim i dy gërmave të para të emrave tanë, Ajlin dhe Erion.
Sa kohë shpenzon me vajzën dhe si e menaxhon kohën mes familjes dhe karrierës televizive?
Mundohem që ta menaxhoj sa më mirë, për të mos cenuar asnjërën. Paraditen ia përkushtoj punës, e gjithë pjesën tjetër familjes. Patjetër që familja është më e rëndë sishmja. Uroj që të kryej detyrat dhe përkushtimin tim si familjar. Po e bëra mirë këtë, me siguri që e bëj mirë dhe punën.
Partnerja jote është diplomuar tek Artet, por punon në administratë, pra në Bashkinë e Tiranës. Cila është një anë e mirë e bashkëshortes që nuk është person publik?
Megjithëse punon në administratë, bashkëshortja ime bën përsëri profesionin e saj, në Drejtorinë e Kulturës. A ka të mira mosqenia e saj person publik? Po, ka. Por qenia e një personi publik, e sidomos në vende të vogla si Shqipëria, ka më shumë të mira. Le ta themi hapur këtë.
Kthehemi te “Portokallia”. Do të jesh sërish pjesë e dyshes me Bes Kallakun, apo do të ndryshosh qëndrim politik?
Po, do të jem me Besin. Por në një dyshe krejtësisht të re, tashmë jo si vetvetja, por si personazhe. Personazhe të reja në rrethana të reja. Nuk do të merremi me politikë në boshtin e personazheve, por me një temë sociale shumë të fortë, e cila në shoqëri është kthyer gati në virus. Por vetëm kaq mund të zbuloj…
Si asistenti i sjelljeve aristokrate të Bukrës, cilat janë disa këshilla që do të dëgjojmë këtë sezon të ri?
Edhe Bukra këtë sezon do të jetë në rrethana të reja, ku unë do t’i mungoj si partner, por jo si skenarist i personazhit, ku bashkë me Albanën, do të mundohemi të japim më të mirën.
Rolin e këshilltarit të Kryeministrit do takesh sërish?
Për sa politika jonë do të jetë kaq e paaftë, kaq e papjekur dhe joserioze, nuk do të shpë tojë nga “Portokallia”. Edhe në këtë aspekt kemi surpriza.
