Erion Isai rrëfen për herë të parë jetën private: “Jam ndarë, kam një romancë të re dhe jam në paqe me veten”
Kryebashkiaku i Kolonjës, Erion Isai, ka vendosur të flasë hapur për herë të parë mbi jetën e tij personale, gjatë një interviste në emisionin “Goca dhe Gra”. Ai ka pranuar publikisht ndarjen nga bashkëshortja dhe faktin se tashmë është në një lidhje të re.
“Nuk jam prifti i Kolonjës, por kryetar bashkie,” – tha Isai me një dozë ironie, duke shtuar: “Çdo ndarje ka vështirësitë e veta, por sot jam në një paqe të jashtëzakonshme me veten. E konsideroj një nga vendimet më të drejta që kam marrë në jetë.”
Edhe pse divorci kishte ndodhur prej kohësh, Isai theksoi se ishte vetëm tani momenti i duhur për ta bërë publike:
“Më i vështiri është procesi i përshtatjes – ideja që vajzat ndajnë kohën mes nënës dhe babait. Është një sfidë, por edhe një rrugëtim që e ecën shkallë-shkallë. Nuk dua të rikthej në vëmendje arsyet e ndarjes, por e di që ka qenë një vendim i mirë për të dy.”
Kur u pyet për një postim të mëhershëm të ish-partneres, ku ajo shprehej se “është e vështirë të bësh dhe gruan dhe burrin”, Isai u tregua i përmbajtur:
“Nuk dua të komentoj publikisht për të. Do ta respektoj gjithmonë si nënën e fëmijëve të mi. Përsa i përket kujdesit ndaj vajzave, jam përtej asaj që përcakton gjykata – i pranishëm sa herë që kanë nevojë, në çdo ditë, në çdo aktivitet.”
Në rrëfimin e tij të sinqertë, Erion Isai konfirmoi edhe një zhvillim të ri në jetën personale:
“Po, kam një romancë të re. Kam një jetë të re, dhe i jap llogari vetëm vetes dhe personit tim të zemrës. Nuk më interesojnë thashethemet, portalet, as ‘kazani’. Më rëndësi për mua është që jam mirë me veten.”
