Në ndeshjen Kosovë–Zvicër, që u mbyll me rezultatin 1-1, atmosfera në stadium mori një kthesë të pazakontë: sa herë Granit Xhaka prekte topin, disa tifozë nisën ta fërshëllenin. Kapiteni i Zvicrës, i lindur nga prindër shqiptarë, e pranoi se ky reagim e la pa fjalë.
I habitur dhe i mërzitur, Xhaka tregoi se nuk e kishte imagjinuar një situatë të tillë, veçanërisht në një vend që e konsideron si “shtëpi”.
“Jam i befasuar është gjëja e fundit që kam pritur, veçanërisht këtu në shtëpi. Dhemb, por më duhet ta pranoj. Mundohem të përqendrohem vetëm në futboll. Për fat të keq, është pjesë e lojës. Kjo nuk është hera e parë, jam fërshëllyer edhe nga 60 mijë njerëz dhe jam rikthyer sërish. Gjithnjë kam pasur përkrahjen e tifozëve të Zvicrës, pavarësisht nëse kemi luajtur në shtëpi apo në transfertë”, tha mesfushori.
Si nisi gjithë situata?
Ndeshja startoi normalisht, por tensioni u rrit menjëherë pas disa fërshëllimave të para. Madje, një pjesë e tifozëve të Kosovës zgjodhën të largoheshin nga stadiumi. Shkaku lidhet me një intervistë që Xhaka kishte dhënë më herët, ku komenton zgjedhjen e disa lojtarëve si Leon Avdullahu dhe Albian Hajdari për të përfaqësuar Kosovën, dhe jo Zvicrën.
Në intervistë, Xhaka tha:
“Lojtarë me kualitetet e tyre janë përfundimisht diçka që nuk dëshiron të heqësh dorë. Nga perspektiva e tyre, çështja është të jenë në gjendje të vlerësojnë statusin e tyre.”
Ai shtoi më tej:
“A do t’ia dilnin të siguronin një pozitë të rregullt startuese te përfaqësuesja e Zvicrës në tri apo katër vjetët e ardhshme? Do ta vija në dyshim këtë, duke marrë për bazë se kush nuk po luan për ne momentalisht, por është më përpara në karrierën e tyre. Ardon Jashari ishte me ne për tri vjet dhe ka bërë katër paraqitje. A është Leoni më përpara se Ardoni? Nuk mendoj kështu. Por ai është një djalë i mirë, përndryshe nuk do të luante çdo ndeshje për Hoffenheim-in. Ndoshta i ka munguar pak durimi në lidhje me Zvicrën. Por në fund të fundit, është vendim i tyre që të luajnë për Kosovën, që tani po luan në nivel shumë të lartë.”
Këto komente ndezën polemika, dhe rezultati u pa në stadium: çdo prekje e topit nga Xhaka shoqërohej me fërshëllima, derisa situata u qetësua nga stafi i sigurisë.
Ndërkohë që në stadium atmosfera u tensionua, rrjetet sociale shpërthyen në mbështetje për Xhakën. Njerëzit e cilësuan pritjen si “të padrejtë” dhe “të turpshme”, një ndjesi që u shfaq edhe në postimin e Blendi Fevziut, ku komentuesit shprehën keqardhje për mënyrën si u trajtua futbollisti.
