Festivali ‘Sundance’ u mbajt edhe këtë vit si çdo herë tjetër në Utah nga data 29 janar deri sot. Pjesë e tij këtë vit ishte edhe filmi ‘Hive’ ose ‘Zgjoi’ që u vlerësua me plot 3 çmime: ‘World Cinema Grand Jury Award’, ‘World Cinema Best Director’, ‘World Cinema Audience Award’. Shumë personazhe të njohur kanë përgëzuar regjisoren dhe skenaristen Blerta Basholli dhe kastin e aktorëve, ku ndër të tjerë janë: Yllka Gashi, Cun Lajci, Aurita Agushi, Kumrije Hoxha dhe Adriana Matoshi.
Ky film është bazuar në një ngjarje të vërtetë dhe në qendër ka Fahrijen, burri i së cilës është zhdukur që prej luftës së Kosovës. Ajo përpiqet të ngrejë një biznes të vogël që të sigurojë të ardhura për fëmijët, por ndërkohë përballet me mentalitetin patriarkal. Fahrija duhet të marrë një vendim të rëndësishëm.
‘Sundance’ është festivali i pavarur më i madh dhe më i rëndësishëm në SHBA./revistawho.com
