Biznesmeni Elton Ilirjani njoftoi së fundmi se këngëtarja e njohur Parashqevi Simaku, e shtruar prej dy javësh në një spital psikiatrik, ka pranuar më në fund trajtimin mjekësor të nevojshëm.
Në një postim në rrjetet sociale, Ilirjani ndau emocionet e tij pas bisedës telefonike me këngëtaren:
“Parashqevi Simaku sapo më telefonoi nga spitali dhe më tha që i kishin aplikuar injektimin e parë! Zoti është i madh,” shkroi ai.
Ngjarja ka prekur gjithashtu familjen e artistes. Ani Simaku, mbesa e Parashqevit, falënderoi Ilirjanin për mbështetjen e dhënë:
“Pas shumë mundimesh, halla po merr mjekimin e duhur. Shumë faleminderit të gjithëve për mbështetjen, faleminderit @eilirjani për gjithçka që po bën,” tha ajo.
Ilirjani, i prekur thellë nga situata, publikoi një mesazh të gjatë dhe emocional ku përshkroi sfidat e përpjekjes për ta ndihmuar këngëtaren:
“Flutura jonë filloi të rikthehet mes nesh! Sot ajo nisi kthesën! Plot 34 ditë sakrificë, magji, dashuri, sfida, lodhje, gëzim, lot, frikëra! Por në fund: FITUAM! Atë që askush nuk arriti ta bënte për 25 vite! ASKUSH!” shkroi ai.
Biznesmeni gjithashtu shfaqet në një foto të veçantë, i veshur me peliçen e Parashqevit, në kujtim të momentit kur këngëtarja u gjet në stacionin e trenit. Në postimin e tij, ai shtoi:
“Jam krenar për ty, flutur! Krenar edhe për veten time sepse kjo ishte thjesht dhe vetëm dashuria që kam për ty! Derisa ti të shërohesh, unë do vishem si ti në Penn Station.”
