Ylli Limani i ka bërë një thirrje të hapur Flor Mumajesit, duke i bashkuar zërin me fansat që prej kohësh kërkojnë rikthimin e kantautorit në skenë. Gjatë një eventi në Prizren, pak para se të interpretonte këngën “Hana” në bashkëpunim me Florin, Limani i është drejtuar artistit dhe audiencës me fjalët:
“I bëjmë thirrje bashkë Flori Mumajesit që të kthehet në muzikë. Flori, të duam, na mungon!”
Video e publikuar në rrjetet sociale ka marrë një reagim të ngrohtë nga publiku, me brohoritje dhe duartrokitje të shumta.
Flor Mumajesi, i cili prej vitesh është larguar nga skena dhe nuk ka qenë aktiv as si këngëtar e as si kantautor, ka pasur fansa që shpesh kërkojnë rikthimin e tij online. Megjithatë, deri tani nuk ka pasur asnjë reagim nga ana e artistit.
