Sot është dita kur erdhi në jetë njē artist, që gëzoi zemrat e shqiptarëve edhe në vitet e tyre më të vështira. Ai që na dhuroi shumë të qeshura me humorin e tij, e kurrë nuk na u ankua për fatin e keq që i ra. Aktori Met Bega u nda nga jeta dy vite më parë, pas një kohe të gjatë i sëmurë me parkinson. Sot e bija e kujton, me një mesazh që na emocionoi të gjithëve. Ajo shpreh mall, shumë krenari e një dashuri të madhe. Ashtu siç edhe ne do e kujtojmë gjithmonë artistin tonë.
DEDIKIMI
“Sot është data 7 gusht, një datë që nuk do ta harroj derisa të vdes, është data e ditëlindjes së babait tim. Unë jam Matilda Bega por pak ma dinë emrin. Unë për të gjithë jam e bija e Met Begës. Edhe pse u bënë 2 vite pa babin, përditë e njëjta pyetje: mos je gjë e bija e Met Begës. Sa mirë ndjehem, se kështu ai mbetet me mua deri në vdekje. Edhe pse mama e 2 fëmijëve, mbetem e bija e Metit. Madje edhe fëmijëve të mi Reas edhe Geldit tashmë u thonë mbesa dhe nipi i Met Begës, për të cilët gjyshi pati shumë ëndrra, por nuk mundi. U sëmur, vuajti shumë nga një sëmundje të cilën ai nuk e meritonte. Gjithsesi për një gjë jam e sigurt, ai vuajti gjatë nga sëmundja në tokë por tashmë një gjë është e sigurt, ai është në parajsë. Kurrë nuk do ja kujtoj ditën e vdekjes tim eti. Për të ka vetëm një datë ,data e lindjes 7 gusht.?Këtë datë ai vetë e kishte të shenjtë. Bënte 2 festa, një në shtëpi një me koleget e estradës. Gëzuar ditëlindjen baba! Festo aty në parajsë ku e meriton…”/ revistawho.com
