FOTOT / INGRIT GJONI:  MIRË SE VINI NË  SHTËPINË TIME

[metaslider id=1393]

NGA ERALDO REXHO / FOTOT: GELJANT KALECI

INGRIT GJONI, NË NJË RRËFIM PËR HAPËSIRËN E SAJ INTIME. KOHA E SHPENZUAR NË SHTËPI, MARRËDHËNIA ME KUZHINËN, KËNDI I PREFERUAR DHE DËSHIRA PËR T’U KTHYER PAS NË KOHË. NJË SHTËPI MODERNE, PËR NJË KËNGËTARE QË ËSHTË GJITHMONË NË MODË.

Sa kohë shpenzon në shtëpi?

Në vrullin e një dite të ngarkuar me punë, shtëpia është parajsa ku gjej qetësinë, e për këtë përpiqem që, sa herë kam një moment të lirë shkoj në shtëpi, për të kaluar disa çaste relaksi.

Puna jote ka shumë udhëtime, të mungon shtëpia kur je larg?

Sigurisht që më mungon, por pas koncerteve jashtë Shqipërisë, fle me mendimin që nesër do jem në shtëpi.

E ke zgjedhur vetë arredimin e shtëpisë?

Absolutisht! Kam zgjedhur stilin modern, që i përshtatet edhe mënyrës se si unë jetoj. Apartamenti është i bollshëm dhe ka vend për të plotësuar të gjitha nevojat e mia. Në sallon dhe në dhomën e gjumit dominojnë e bardha dhe e zeza, kuzhina është e gjitha gri metalike, ndërsa dhoma e djalit është e gjelbër.

Merresh vetë me punë shtëpie?

Kur kam kohë, më pëlqen t’i kushtohem shtëpisë, por në të shumtën e rasteve këtë pjesë e bën një zonjë që më ndihmon në mirëmbajtjen e apartamentit.

Po me kuzhinën, si i ke marrëdhëniet?

Më pëlqen shumë gatimi. Vdes të bëj eksperimente në kuzhinë dhe ata që i shijojnë bëjnë gjithmonë komente shumë të mira. Përparësja e bardhë është veshja ime e preferuar kur jam në shtëpi (qesh).

Çfarë bën në shtëpi gjatë kohës së lirë?

Më pëlqen të kthehem pas në kohë, të shfletoj albumet familjare, revistat e dikurshme… Ndoshta pas disa vitesh do jem duke shfletuar këtë revistë.

Cili është këndi yt i preferuar?

Pas kuzhinës, këndi i ndenjes.

Shpenzon kohë duke parë televizor?

Më shumë sesa me televizor, shpenzoj kohë duke dëgjuar muzikë. Radioja është gjithmonë në sfond, për mua nuk ka dalë nga moda. Sepse, në ndryshim nga pajisjet e reja teknologjike që të ofrojnë mundësi për të dëgjuar muzikë, radioja nuk ndalon kurrë dhe nuk i përsërit këngët aq shpesh sa do të përsëriteshin në një listë të krijuar nga unë.