Arban Përlala i njohur si G Bani, ishte një ndër reperat më të njohur në vitet 2000. Ai u afirmua për publikun shqiptar në vitin 2004 si konkurrent i edicionit të parë të ‘Top Fest’, që u organizua dhe transmetua nga Top Media. Më pas karriera e reperit mori një tjetër kthesë në Greqi pasi ka luajtur në disa seriale. Por ku është tani G Bani? Çfarë ka ndodhur me jetën e tij gjatë këtyre viteve? Këtë e shumë të tjera i mësoni në intervistën e tij të dhënë për “Intv.al”.
G Bani dikur një ndër reperat më të pëlqyer nga rinia, ku është sot?
Sot në krye të një firme të vogël që tregton paisje elektroshtëpiake këtu në jug të Suedisë.
Si ka vazhduar jeta jote gjatë këtyre viteve? Çfarë ka ndodhur?
Jeta ime si jeta e të gjithëve ne, me suksese dhe sfida. Janë shumë vite për tu treguar me pak fjalë. Por ideja është që jeta prej vërteti nuk është njësoj me jetën e karrierës mediatike.
Akoma edhe sot mbetet në kujtesën e fansave tuaj dueti i famshëm me Crazy Girl. Vazhdoni t’i ruani kontaktet?
Crazy Girl mund ta gjeni në Athinë ose në Mykonos. E martuar, me tre fëmijë dhe ‘businesswoman’ e suksesshmE. Është në pronësi të një kave me verëra të zgjedhura, në Athinë. Po, kemi kontakt familjarisht.
Çfarë të mungon më shumë nga ajo periudhë?
Nga ajo periudhë më mungon më shumë Tirana e Bllokut, fama mediatike dhe dy tre prezantuese. Edhe Boku (Bojken Lako) që funksiononte si Big Brother sidomos gjatë muajve të Top Fest.
Nëse do ta nisje karrierën nga fillimi, çfarë do bëje ndryshe?
Më pak këngë, më shumë videoklipe.
Ku qëndrojnë meritat e tua lidhur me muzikën e asaj kohe?
Meritat e mia qëndrojnë në faktin që kam ushqyer një gjeneratë të tërë me muzikën time. Dhe kam dalë kaq shumë i fituar nga ky aktivitet.
Nëse G Bani i sotëm do takonte G Banin e dikurshëm, çfarë do t’i thoje?
A o Ban. (Qesh)
