Pikërisht tani që keni menduar se i patë dhe i mësuat të gjitha për dasmën e vajzës së dytë të ish-Presidentit Bamir Topi me djalin e biznesmenit Luan Bregasi, revistawho.com sjell të tjera imazhe dhe detaje të pazbuluara nga dasma…
Kështu teksa mësuam mbi 300 të ftuarit që mbushën plot oborrin e vilës “ETNA” (Etida dhe Nada, vajzat e familjes Topi); menunë e pasur që ishte tradicionale shqiptare; këngëtarët që performuan (Sidrit Bejleri, Juliana Pasha); fustanet e veshura nga nusja, që ishin njëri i krijuar enkas për të nga linja “Geraldina Sposa”, e cila bëri dhe organizimin e mbrëmjes dhe tjetri nga Lili Sposa, salloni që është në pronësi të artites së make up-it Lili Ismaili, e cila u kujdes edhe për dukjen e nuses; tani është momenti të zbulojmë emrat e të ftuarve VIP nga bota e politikës dhe ekranit.
Kryetari i Bashkisë së Tiranës Erion Veliaj, i cili drejtoi edhe ceremoninë e celebrimit të çiftit Etida dhe Ilir në martesë, ishte i ftuar së bashku me partneren e tij, Ajola Xoxa. Deputeti i Partisë Socialiste, Taulant Balla, ishte gjithashtu i shoqëruar nga bashkëshortja. Ftesa kishte shkuar çift edhe për Ministrin e Mirëqenies Sociale, Blendi Klosi, politikanin Arben Malaj dhe për ish-Presidentin Alfred Moisiu. Ndërkohë që veç emrave të politikës në këtë gëzim të familjes Topi ishte prezent edhe shoëman-i, Ardit Gjebrea me bashkëshorten.
Ndryshe nga ç’u fol më parë, këngëtari Albano Carrisi nuk mundi të ishte prezent për shkak të një koncerti të paracaktuar në axhendë, por si mik i familjes erdhi disa ditë përpara dasmës për t’i uruar. Një tjetër personazh publik që u pa gjithashtu në darkë ishte Armina Mevlani, e cila nuk shoqërohej nga Shkëlzeni, por nga miqtë e saj të gjimnazit si pjesë e shoqërisë së ngushtë të nuses, Etida Topi.
